یەکیەتی زانایانی ئایینی کوردستانی ئێران بە بۆنەی ١٠ی خاکەلێوە، ڕۆژی شەهیدانی کوردستان پەیامێکی بڵو کردەوە.
دەقی پەیامەکە بەم چەشنەیە:
هاونیشتمانیان و خەڵکی تێکۆشەری کوردستان بە تایبەت ڕێبەرایەتیی حیزبی دێموکراتی کوردستانی ئێران و وەفادارانی ڕێبازی پڕ شکۆی پێشەوای کوردان:
ئەمڕۆ لە ١٠ی خاکەلێوە هاوشێوەی هەموو ساڵێک لە ساڵوەگەڕی کوژانەوەی ئەستێرەی ناسراوی کورد، پێشەوا قازی موحەممەددا، وەک ئەمەگ و وەفاداری و پەیمان نوێکردنەوە لەگەڵ ڕێبەر و هاوڕێیانیدا ئەم ڕۆژە وەک ڕۆژی شەهیدان یاد دەکەینەوە و تاجەگوڵینە لە سەر گڵکۆی شەهیدان دادەنین.
ئێمە لە حاڵێکدا ئەم یادە دەکەینەوە کە یاد و ناوی پێشەوامان هەروا شکۆمەندانە لە بێشکەی مناڵی کورددا تاکوو گەیشتن بە ئامانجی ڕێبەر و پێشەوامان هەروا دەزرینگێتەوە و ڕێبازی تاقەگوڵی سەحرای کوردستان دەدرەوشێتەوە، بەڵام بکوژان و خیانەتکاران بە کۆمار و ڕێبەرمان، نەک هەر لە ناو خاکی ئێراندا، بەڵکوو لە هەندەرانیش کەوتوونەتە چاڵی لە بیربردنەوە!
پێشەوا مرۆڤێکی بە هزر و وردبین و دواڕۆژبین و زۆر سیاسی و هاوکات بەڕاستیش فیداکار و گیانبازی ڕاستەقینە بوو، پێشەوا پاش هەڵسەنگاندنی وەزعی موجود و بێ پشت و پەنابوونی کورد و هێزی سەربازیی کورد، زۆر دڵسۆزانە ڕێگایەکی هەڵبژارد کە هەم فیداکاری و گیانبازیی فێری ڕۆڵەکانی دوای خۆی بکات هەم کورد و نیشتمانی کوردان لە قەڵاچۆی دۆژمنی پۆشتە و پەرداخی ئەو کات بە فیداکردنی گیانی پاکی خۆی ڕزگار بکات.
ئەو حەرەکەتە بوێرانەی پێشەوا نەک هەر شۆڕشی کوردی کپ و بێدەنگ نەکرد بەڵکوو خوێنی پێشەوا بوو بە چرای خەباتی بەردەوامی و شۆڕشگێری و ئەمەگناسیی تاکەکانی کورد لە کوردستاندا.
ئێستا دەبینین ڕۆژ بە ڕۆژ ڕێبازی پێشەوا پەرە دەستێنێت کە گرینگترین ویست و خواست و هیوای پێشەوا، هۆشیاری نەتەوەیی بوو کە ئێستا پاش ٧٨ ساڵ لە دوای لەسێدارەدانی پێشەوا و هاوڕێیانی نەورۆزی کوردەواریمان بە جلکی شۆڕشگێڕی و خاکیپۆشی و جامانە لەمل بە یەکگرتوویی بەڕێوە برد کە گشتی دەگەڕێتەوە سەر فیداکاری و بەخشەندەگی ئەو ڕێبەرە مەزنەمان ئەگینا گەر پێشەوا ئەم گیانبازییەی نەکردبا ڕەنگ بوو حیزبی دێموکراتیش هاوشێوەی حیزبەکەی ئازەبایجان بە سەرۆکایەتی جەعفەری پیشەوەری لە ناوچووباو خەباتی گەلەکەمان بێ دەنگ با.
بۆیە دەبێ ئێمەی کورد بە گشتی و حیزبی دێموکرات بە تایبەتی شانازی بە وەها ڕێبازێک بکات کە بناغەکەی بە بەخشینی خوێنی ڕێبەر و پێشەوای نەخشاوە و هیچ هێزێک ناتوانێ بیڕووخێنێ و ئێمەش لانیکەم ئەرک و وەفاداریمان تا دوایین دڵۆپی خوێنمان بە باشی بەجێ دەگەیەنین.
یەکیەتیی زانایانی ئایینیی کوردستانی ئێران جارێکی تر سڵاو دەنێرین بۆ ڕۆحی پاکی پێشەوا و هاوڕێیانی و سەرجەم شەهیدانی بزاڤی ڕزگاریخوازیی گەلەکەمان و پەیمان نوێ دەکەینەوە هەردەم پاڵپشت و پشتیوانی ئەم ڕێبارە پاک و سەربەرزە بین.
سڵاو لە تۆ پێشەوای کوردان، سڵاو ئەی شەهیدانی سوورخەڵاتی نیشتمان، سڵاو شۆڕشگێرانی ڕێبازی قازی..
بڕووخێت کۆماری تێرۆریست و پەت و سیدارەی ئیسلامیی ئێران.
یەکیەتیی زانایانی ئایینیی کوردستانی ئێران
٩ی خاکەلێوەی ساڵی ١٤٠٤ی هەتاوی
