دۆخی تەندروستیی وریشە مورادی بەندکراوی سیاسیی کورد کە سزای لەسێدارەدانی بەسەردا سەپێنراوە و ناجێگیربوونی و بەم حاڵەوە لە چاودێری پزیشکی بێبەش کراوە.
بەپێی ڕاپۆرتی ڕێکخراوی مافی مرۆڤی"هەنگاو"، وریشە مورادی بەندکراوی سیاسیی خەڵکی شاری سنە سەرەڕای پێویستی بەپەلەی بە چاودێری پزیشکی، بە هۆی بەربەستی دامودەزگاکانی ڕێژیم و بەرپرسانی زیندان، لە چارەسەری پزیشکی بێبەش کراوە و کاربەدەستانی ڕێژیم لە زیندانی ئێڤین، لە ڕەوانەکردنی ناوبراو بۆ ناوەندە دەرمانییەکانی دەرەوەی بەندیخانە خۆیان دەبوێرن.
ئەم بەندکراوە سیاسییە تووشی نەخۆشیی دیسکی پشت و مل بووە و سەرەڕای ئەوەی کە سێ مانگ بەسەر پێشنیاری نەشتەرگەریی پزیشکی ناوبراودا تێپەڕیوە، بەرپرسانی ڕێژیم و ناوەندە ئەمنیەتییەکانی ڕێژیم ڕێگرییان لەو نەشتەرگەرییە کردووە.
وریشە مورادی لەلایەن لقی ١٥ی دادگای ئینقلابی ڕێژیمەوە لە تاران بە سەرۆکایەتیی بەناو دادوەر ئەبووقاسم سەڵەواتی (دادوەری مەرگ) بە تۆمەتی "بەغی" سزای لەسێدارەدانی بەسەردا سەپێندراوە.
ئەم ژنە چالاکە کوردە لە کاتی دەستبەسەرکردنیدا دوو جار بانگی لقی ٥ی دادسەرای گشتی و شۆڕشی ڕێژیم لە تاران کراوە و بە تۆمەتی "بەغی لە ڕێگەی ئەندامەتی لە یەکێک لە حیزبە کوردستانییەکانی دژبەری ڕێژیمی ئێران" تۆمەتبار کراوە.
وریشە مورادی لە ڕێکەوتی ١٠ی گەلاوێژی ساڵی ١٤٠٢ لە شاری سنە بە شێوەیەکی توندوتیژانە لەلایەن هێزە ئەمنییەکانی ڕێژیمەوە دەسبەسەر کرا. لە ٢٥ی بەفرانباری هەمان ساڵدا، دوای تەواوبوونی لێکۆڵینەوە و لێپرسینەوە، لە زیندانی وەزارەتی ئیتلاعات، بۆ بەندی ٢٠٩ی زیندانی ئێڤین، و بەشی ژنانی ئەم زیندانە گواسترایەوە.
