دۆناڵد ترامپ سه‌رۆککۆماری ئه‌مریکا له نوێترین لێدوانی خۆیدا هه‌ڕه‌شه‌ی له ڕێژیمی ئێران کردووه که ئه‌گه‌ر نه‌گه‌یه‌نه ڕێککه‌وتنی دڵخواز، ڕووداوگه‌لێکی نه‌خوازراو له ڕێگه‌دایه.
له درێژه‌ی ململانێ ناوکی و دیپلۆماتییه‌کییه‌کانی نێوان ئه‌مریکا و ئێران، دۆناڵد ترامپ سه‌رۆککۆماری ئه‌مریکا، ڕۆژی هه‌ینی ٨ی خاکه‌لێوه له‌باره‌ی ئه‌گه‌ری ڕێکنه‌که‌وتنی نوێ له‌باره‌ی به‌رنامه‌ی ناوکیی ڕێژیمه‌وه وتی: ده‌بێت ئێران چاوه‌ڕوانی ده‌رهاویشته‌ی زۆر خ‌راپ بێت.
هه‌روه‌ها ترامپ وتوویه‌تی: "من پێم باشه له‌گه‌ڵ ڕێژیمی ئێران ڕێک بکه‌وین به‌ڵام ئه‌گه‌ر ئه‌وه ڕووی نه‌دا ئه‌وە ڕووداوگه‌لێکی زۆر چاوه‌ڕواننه‌کراو چاوه‌ڕوانی ئه‌و وڵاته‌یه".
ئه‌و هه‌ڕه‌شانه‌ی ترامپ له کاتێکدایه که وڵاته‌که‌ی له ناوچه‌ی ڕۆژهه‌ڵاتی نێوه‌ڕاستدا خه‌ریکە په‌ره به بواری نیزامیی خۆی ده‌دات و له‌و بواره‌وه زۆر خۆی به‌هێزتر و ئاماده‌تر کردووه.
پیت هێگست، وه‌زیری به‌رگریی ئه‌مریکا له‌م دواییانه‌دا ناوێکی فڕۆکه‌هه‌ڵگر به‌ناوی یوو ئێس ئێس ڤینستۆنی بۆ په‌یوه‌ستبوون به گرووپی زه‌ربه‌رتی یوو ئێس ئێس هێری ئێس ترۆمێنی بۆ ناوچه‌که ناردووه.
پێشتریش عەباس عێراقچی لە چاوپێکەوتنێکی لەم دواییانەدا جارێکی دیکە ئاماژەی بەوە دابوو کە ئێران بەم زووانە وڵامی نامەکەی ترامپ بۆ خامنەیی دەداتەوە و وتبووی: ''ناردنی نامە و نامەنووسی بەشێکە لە دیپلۆماسی. بەڵام هاوکات دەتوانێت بەشێک بێت لە گوشار و هەڕەشە".
دوو حەفتە لەمەوبەر سەرۆککۆماری ئەمریکا لە چاوپێکەوتنێکدا لەگەڵ کاناڵی تلویزیۆنیی "فاکس نیووز" ڕایگەیاندبوو کە نامەیەکی بۆ عەلی خامنەیی ناردووە و پێشنیاری دانوستانی ڕاستەوخۆی کردبوو.
دواتر بەرپرسێکی ئەمریکا و دوو سەرچاوەی ئاگادار لە ناوەڕۆکی نامەکەی ترامپ بە ماڵپەڕی ئاکسیۆسیان ڕاگەیاند کە ترامپ دوو مانگی کات بە تاران داوە بۆ ئەوەی لەگەڵ واشنگتۆن بگەنە ڕێککەوتنێکی نوێی ناوکی.
