باڵوێزێکی پێشووی کۆماری ئیسلامی باسی لەوە کردووە کە سزاکانی ئەمریکا نە تەنیا هاوکارییە ئابوورییەکانی ئێران لەگەڵ ئورووپای زۆر کەم کردووەتەوە بەڵکوو پێوەندییە بازرگانییەکانی لەگەڵ خۆرهەڵاتی ئاسیاش تا ڕادەیەکی بەرچاو سنووردار کردووەتەوە.
عەلی ماجدی، باڵوێزی پێشووی کۆماری ئیسلامی لە وڵاتانی ئاڵمان، ژاپۆن و برزیل، لە وتووێژێک لەگەڵ هەواڵدەریی ئیلنای ڕێژیم ڕایگەیاندووە کە لە ئێستادا بەهۆی گەمارۆکانی ئەمریکاوە هیچ یەک لە وڵاتانی خۆرهەڵاتی ئاسیا جگە لە چین، لەگەڵ کۆماری ئیسلامی هاوکاری ناکەن.
ماجدی زیادی کردووە کە وڵاتانی پێشکەوتووی ئاسیا وەک ژاپۆن، کۆرەی باشوور و لەم دواییانەشدا هێند، پێوەندییە بازرگانییەکانیان لەگەڵ ئێران بە تەواوی کەم کردووەتەوە.
ناوبراو پشتڕاستی کردووەتەوە کە پێشتر نزیک بە سێ لە سەر چواری نەوتی هەناردەکراوی ئێران بەرەو ناوچەکانی خۆرهەڵاتی ئاسیا ڕەوانە کراوە بەڵام لە ئێستادا ئەوەش لەنێو چووە.
بەپێی زانیاریی سەرچاوە جیهانییەکان، هەناردەکردنی نەوتی ئێران بۆ چین لە پاش هاتنەسەرکاری دەوڵەتی دۆناڵد ترامپ تا ڕادەیەکی بەرچاو کەمی کردووەتەوە.
کۆماری ئیسلامی لە ڕێگەی کەڵکوەرگرتن لە کەشتییەکانی ناسراو بە "ناوگانی ڕۆحەکان"ـەوە کە بەو نەوتهەڵگرانەی دەوترێت ڕادارەکانیان دەکوژێننەوە، نەوتی ئێران بۆ چین قاچاخ دەکات و بەرپرچی گەمارۆکانی ئەمریکا ئەداتەوە.
