دۆناڵد ترامپ سه‌رۆککۆماری ویلایه‌ته یه‌کگرتووه‌کانی ئه‌مریکا ڕوو له عه‌لی خامنه‌یی ڕێبه‌ری ڕێژیمی ئێران وتی: "یان ڕێککه‌وتن یان بۆمباران".
ڕۆژی یه‌کشه‌ممه ١٠ی خاکه‌لێوه، ترامپ له په‌یامێکی ڕاشکاودا له دژی کۆماری ئیسلامی ڕایگه‌یاند: "یان له‌گه‌ڵمان ڕێک ده‌که‌ون یان بۆمبارانتان ده‌که‌ین" و ترامپ له‌و باره‌وه هۆشداریی توند و جیددیی داوه. له کاتی هاتنه‌سه‌رکاریی ترامپه‌وه ئەمە یه‌که‌مین جاره ئاوا په‌یامێکی توند بڵاو ده‌کاته‌وه.
ترامپ له وتووێژێکیدا له‌گه‌ڵ ئێن بی سی جه‌ختی له سه‌ر ئه‌وه کرده‌وه که ئه‌گه‌ر ڕێژیمی ئیسلامیی ئێران له‌گه‌ڵ ئه‌مریکا دانوستان نه‌کات و نه‌گاته ڕێککه‌وتنی ناوکی، ئه‌وا ئه‌مریکا هێرشێک ده‌کاته سه‌ر ئێران که وێنه‌ی نه‌بێت.
ئه‌و هه‌ڕه‌شانه‌ی سه‌رۆککۆماری ئه‌مریکا له کاتێکدایه که له‌و وتووێژه‌یدا ڕایگه‌یاندووه که "له ئێستادا له‌گه‌ڵ ڕێژیم له دانوستاندان و ئه‌وه‌ی خامنه‌یی که پێشتر دانوستانی به بێ شه‌رافه‌تی ده‌زانی، ئێستا له ژێر گوشار و ترسدا ناچاره دانوستان قبووڵ بکات".
شایانی باسه ڕێکه‌وتی ١٩ی ڕێبه‌ندانی ساڵی ١٤٠٣ی هه‌تاوی، خامنه‌یی ڕێبه‌ری ڕێژیم، دانوستان له‌گه‌ڵ ئه‌مریکای به بێ عه‌قڵی و بێ شه‌رافه‌تی له قه‌ڵه‌م دا.
له ماوه‌ی نزیک به سێ حه‌فته‌ی ڕابردوودا، ترامپ له ڕێگه‌ی ویلایه‌ته یه‌کگرتووه عەرەبییە‌کانه‌وه، نامه‌یه‌کی بۆ خامنه‌یی ڕێبه‌ری ڕێژیم نارد و خوازیاری ڕێککه‌وتن لەسەر وه‌لانانی به‌رنامه‌ی ناوکیی ڕێژیم بوو و هۆشداریشی دا له ئه‌گه‌ری بڕیاری پێچه‌وانه‌ی ئه‌و داواکارییه‌دا، ئه‌وا بژارده‌ی نیزامی له‌به‌ر ده‌ستدایه.
هه‌روه‌ها ڕێژیمی ئیسلامیی ئێران له ڕێگه‌ی وڵاتی عومانه‌وه وڵامی نامه‌که‌ی ترامپی دایه‌وه و هه‌رچه‌ند له نێوه‌ڕۆکی نامه‌که زانیارییه‌کی ئه‌وتۆ له‌به‌ر ده‌ستدا نییه به‌ڵام ڕۆژی یه‌کشه‌ممه، مه‌سعوود پزشکییان ڕایگه‌یاند: "ئێمه دانوستانی ڕاسته‌وخۆمان قەبووڵ نه‌کردووه و دانوستانی ناڕاسته‌وخۆمان پێ باشتره".
به‌پێی زانیارییه‌‌کان ترامپ له دووتوێی نامه‌که‌یدا پەرژاوه‌ته سه‌ر ئه‌وه‌ی که ئێمه ڕێککه‌وتنێکی هاوشێوه‌ی به‌رجاممان ناوێ که ته‌نیا به‌رنامه‌ی ناوکی سنووردار بکات به‌ڵکوو ئامانجمان وه‌لانانی ته‌واویه‌تیی به‌رنامه‌ی ناوکیی ڕێژیمی ئێرانه.
