لە درێژەی سیاسەتی سەرکوتکەرانە و گوشارەکانی ڕێژیمی ئیسلامیی ئێران بۆ سەر بنەماڵە مافخوازەکانی شەهیدانی شۆڕشی ژینا، سلێمان قادرگەڵوان، برای عەبدولسەلام قادرگەڵوان، یەکێک لە شەهیدانی شۆڕشی ژینا لە شاری شنۆ، لەلایەن هێزەکانی ئیتلاعاتەوە دەسبەسەر کرا.
بەپێی ڕاپۆرتی ڕێکخراوی مافی مرۆڤی "هەنگاو"، ڕۆژی پێنجشەممە ٧ خاکەلێوە، سلێمان قادرگەڵوان، ئەندامی بنەماڵەی مافخوازی شەهیدانی شنۆ، دوای بانگکران بۆ ئیتلاعاتی ڕێژیم لەو شارە دەسبەسەر کرا.
تا ئێستا هیچ زانیارییەکی ڕوون سەبارەت بە بارودۆخی ناوبراو و هۆکاری دەسبەسەرکردنی و هەروەها ئەو تۆمەتانەی کە خراونەتە پاڵی بڵاو نەکراوەتەوە.
عەبدولسەلام قادرگەڵوان، برای سلێمان، لە ٣٠ی خەرمانانی ساڵی ١٤٠١ لە درێژەی شۆڕشی ژینادا لەلایەن هێزەکانی ڕێژیمەوە تەقەی لێ کرا و پاش چەند ڕۆژ بە هۆی قووڵیی برینەکانییەوە، لە ڕێکەوتی ٤ی ڕەزبەری هەمان ساڵ لە نەخۆشخانەی خومەینی لە شاری ورمێ شەهید بوو.
