بێنیامین نێتانیاهوو، سەرۆکوەزیرانی ئیسرائیل، باسی لە گەڵاڵەیەک بۆ ڕێگەدان بە چوونەدەرەوەی ڕێبەرانی حەماس لە غەززە کردووە، بەو مەرجەی کە ئەم گرووپە ڕازی بە دانانی چەکەکانی بێت.
هاوکات لەگەڵ هەوڵە نیودەوڵەتییە نوێیەکان بۆ نێبژیوانی و ڕێککەوتنیکی دیکە بۆ ئاگربەست لە غەززە، سەرۆکوەزیرانی ئیسرائیل ڕایگەیاندووە کە ڕێگەی چوونەدەرەوەی ڕێبەرانی حەماس لە غەززە ئەدات، بەڵام بەو شەرتەی کە چیتر چەکدارانی ئەم گرووپە چەکەکانیان دابنێن.
ئەمە لەکاتێکدایە کە سەرکردەکانی حەماس ڕادەستکردنی چەک لە غەززە بە هیڵی سوور دەزانن بەڵام ئامادەیی خۆیان بۆ ڕادەستکردنی بەڕێوەبەریی غەززە، ڕاگەیاندووە.
ئیسرائیل پاش تەواوبوونی ماوەی ئاگربەستەکە هێرشەکانی بۆ سەر غەززە دەست پێ کردووەتەوە.
لە ماوەی ڕابردوودا چەند سەرکردەی باڵای گرووپی حەماس لە هێرشەکانی ئیسرائیل بۆ سەر غەززە کوژراون.
نێتانیاهوو سەبارەت بە دەسپێکردنەوەی هێرشە ئاسمانییەکان بۆ سەر غەززە ڕایگەیاندووە کە کاریگەرییەکانی گوشاری سەربازی هاوکات لەگەڵ گوشاری دیپلۆماتیک، باشترین ڕێگە بۆ بەچۆکداهینانی حەماس و ئازادیی بارمتەکانی ژێردەستی ئەم گرووپەیە کە تاکوو ئێستاش بووەتە هۆی ئازادکرانی هێندێک لە بارمتەکان.
ناوبراو زیادی کردووە کە لە کۆتاییدا حەماس ناچار دەبێت کە چەک دابنێت و ئەگەر ئەوە ڕوو بدات، ڕێگە ئەدرێت بە ڕێبەرانی ئەم گرووپە تاکوو لە غەززە بچنە دەرەوە.
ئەم قسانەی سەرۆکوەزیرانی ئیسرائیل پاش ئەوەیە کە دەوڵەتی ئیسرائیل بەهۆی دەسپێکی دووبارەی هێرشەکانی بۆ سەر غەززە و ئازادنەکرانی هەموو بارمتەکان، بەرەوڕووی کۆمەڵێک ناڕەزایەتی و خۆپیشاندان لە ئیسرائیل بووەتەوە.
لەلایەکی دیکەوە قەتەر، میسر و ئەمریکا لە هەوڵدان تاکوو بۆ جارێکی دیکە ئاگربەستێکی دیکە لە غەززە جیگیر بکەن کە هەر دوو لایەن پێی ڕازی بن.
ڕۆژی شەممە ٩ی خاکەلێوە، یەکێک لە سەرکردە باڵاکانی حەماس پشتڕاستی کردەوە کە ئەم گرووپە گەڵاڵەی پێشنیارکراوی نوێی بۆ ئاگربەست پەسەند کردووە و داواشی لە ئیسرائیل کردووە کە گەڵاڵەکە پەسەند بکات.
ئیسرائیل لەهەوڵدایە تاکوو گەڵاڵەیەکی دیکە پێشنیار بکات کە هەموو مەترسییەکانی ئەم گرووپە کە لەلایەن کۆماری ئیسلامییەوە پشتیوانیی لێ دەکریت، لە غەززە لەنێو ببات.
