پەیامی یەکیەتی پیشەیی مامۆستایانی کوردستانی ئێران بە بۆنەی نەورۆزی خاکیپۆشان

یەکیەتی پیشەیی مامۆستایانی کوردستانی ئێران بە بۆنەی نەورۆزی خاکیپۆشان پەیامێکی بڵاو کردەوە.

دەقی پەیامەکە بەم چەشنەیە:

پەیام پشتیوانی لە نەورۆزی خاکیپۆشان!

خەڵکی مافویستی ڕۆژهەڵاتی کوردستان!

مامۆستایان، خوێندکاران و قوتابییانی ئازیز!

نەورۆز وەک هێما و بۆنەیەکی گەورەی نەتەوەیی بۆتە دەرفەتێک بۆ نیشاندان و سەلماندنی ناسنامە و کولتوور و خۆشەویستیی نیشتمان.

لە ماوەی ساڵانی ڕابردوودا، مامۆستایان و خوێندکاران و قوتابییان بەشدارییەکی گرینگیان لە تێکۆشانی فەرهەنگی و سیاسی و نەتەوەییدا، بەتایبەت لە بەرێوەچوون و ئامادەکاری ڕێوڕەسمەکانی نەورۆزدا گێڕاوە.

یەکیەتی پیشەیی مامۆستایانی کوردستانی ئێران پشتیوانی لەم بانگەوازەی ناوەندی فەرهەنگی رێورەسمەکانی نەورۆزی خاکیپۆشان دەکا و داوا لە مامۆستایانی نیشتمانپەروەر و مافویستیی دەکا ئەمساڵیش وەک ساڵانی پێشوو بە لیباسی خاکی و جامانە و هەوری و گوڵی سوور بەشداری لە ڕێوڕەسمەکانی نەتەوەیی نەورۆز‌دا بکەن.

یەکیەتی پیشەیی مامۆستایانی کوردستانی ئێران

ڕەشەمەی ٢٧٢٤ی کوردی