ڕۆژی دووشەممە ١١ی خاکەلێوە، ئەندامێکی حیزبی دێموکرات بە ناوی محەممەد مووسازادە، ناسراو بە محەممەد سوورەقوادبەگیان، بەهۆی جەڵتەی دڵ لە نەخۆشخانەی سەیدوشوهەدای ورمێ کۆچی دوایی کرد.
ناوبراو لە سەرەتایی لاوەتییەوە وەک ئەندامی تەشکیلاتی نهێنی، بێپسانەوە کاری حیزبیی کردووە و دڵسۆزانە ئامادەی هەموو ئەرکێک بووە.
کاک محەممەد لە ساڵی ۱۳۷٤ی هەتاویدا بە هۆی چالاکیی حیزبییەوە دەگیرێت و بۆ ماوەی ٦مانگ لە زیندانی دەریایی ورمێ دەمێنتەوە؛ ناوبراو پاش ئازادبوونی بۆ ماوەی ٦ ساڵ لەژێر چاودێری چڕدا دەبێت.
کاک محەممەد خاڵۆی دوو شەهیدی قارەمان بە ناوەکانی برامی نەزمی و قادری نەزمی بوو.
کاک محەممەد پیاوێکی بە بیروباوەڕ و تا سەر ئێسقان وەفادار بە حیزبەکەی بوو.
ناوبراو ڕۆژی ٨ی خاکەلێوەی ئەمساڵ، بە یادی جاران سەردانی شاخەکانی قەندیلی کرد و هەمان ڕۆژ تووشی جەڵتەی دڵ بوو.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
