ڕۆژی یەکشەممە ١٠ی خاکەلێوەی ١٤٠٤، دایە فاتمە ڕەسووڵزادە، دایکی شەهیدێکی کوردستان بە ھۆی نەخۆشییەوە کۆچی دوایی کرد.
دایە فاتمە ڕەسوڵزادە دایکی شەھید حەسەن حەسەنزادە ناسراو بە حەسەن سۆفی بوو .
کاک حەسەن حەسەنزادە پێشمەرگەی حیزبی دێموکرات بووە، ناوبراو لە ڕۆژی ٢٢ی بانەمەڕی ١٣٦٣ی هەتاویدا، بۆ سەردان دەگەڕێتەوە بۆ ماڵەکەی خۆیان لە گوندی گۆلێ.
لەو کاتەدا ئاگادار دەکرێتەوە کە گرووپی زەربەتی ڕێژیم خەریکە خۆی دەگەینێتە گوندی گۆلێ. بۆیە قارەمانانە بڕیار دەدات بەتەنیا لەگەڵ ئەو هێزە بکەوێتە شەڕ.
دوای ماوەیەک شەڕ و پێکدادان لەگەڵ گرووپی زەربەت، دوژمن کە دەزانن حەسەن بە تەنیایە و شەڕ لەگەڵ هێزەکەیان دەکات، پاستارەکان لە چەند لاوە پەلاماری دەدەن و ھێرشی بۆ دەکەن کە بەداخەوە کاک حەسەنی سۆفی شەھید دەبێت.
کوڕێکی دیکەی دایە فاتم بەناوی عومەری سۆفی پێشمەرگە و کادری حیزب بوو کە لەسەر ئیزنی حیزب گەڕایەوە نێوخۆی کوردستان و پێوەندیی تەشکیلاتیی خۆی لەگەڵ حیزب درێژە پێ دا. ناوبراو دواتر لە ڕووداوێکی هاتوچۆدا لە ناوچەی ئالانی سەردەشت، گیانی لەدەست دا.
دایە فاتم ژنێکی ئازا و بەجەرگ و پێشمەرگەدۆست بوو کە لەلایەن خەڵک و پێشمەرگەوە ڕێزی زۆری لێ دەگیرا.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
