ڕۆژنامەی "ئیکسپرێس"ی بریتانیا لە ڕاپۆرتێکی تایبەتدا نووسیویەتی، ئەگەر ڕێککەوتن لەگەڵ ترامپ نەکرێت، ڕێژیمی ئێران تا کۆتایی هاوین دەڕووخێت.
بەپێی ڕاپۆرتی "ئێکسپرێس" کە ڕۆژی چوارشەممە ١٣ی خاکەلێوە بڵاو کراوەتەوە، وادەی دیاریکراو بۆ ئێران لەگەڵ زیادبوونی بۆمبهاوێژ و هێزی هێرشبەری ئەمریکا لە ناوچەکە تێدەپەڕێت و ئیسرائیل ئامادەیە ڕێبەریی هێرشەکان بۆ سەر ئێران بکات.
پەیامنێری کاروباری بەرگریی "ئێکسپرێس" لە زاری سەرچاوەکانی خۆی کە پەیوەندییان بە دەوڵەتی ئەمریکاوە هەیە، نووسیویەتی، ئەگەر ڕێژیمی ئێران دەستبەرداری بەرنامە ناوکییە مشتومڕاوییەکەی نەبێت، تا مانگی خەرمانان لەناو دەچێت".
دۆناڵد ترامپ پێشتر هۆشداری دابوو کە ئەگەر تاران لەگەڵ ترامپ لەسەر بەرنامە ناوکییەکەی ڕێکەوتن نەکات، لەگەڵ بوردمانی بەربڵاو بەڕەوڕوو دەبێتەوە، ئەوە لەحاڵێکدایە کە ئەمریکا ناوگانێکی فڕۆکەهەڵگری دیکەی ناردووەتە ڕۆژهەڵاتی نێوەڕاست.
شان پارنێل، وتەبێژی پێنتاگۆن جەختی لەوە کردەوە کە هەر هەڕەشەیەک بۆ سەر ئەمنییەتی ناوچەکە لەلایەن ئێران یان گرووپەکانی سەر بە ئێرانەوە، لەگەڵ وڵامی یەکلاکەرەوەی ئەرتەشی ئەمریکا بەرەوڕوو دەبێتەوە. هەروەها ئەندامێکی دیاری ڕاستڕەوی توندئاژۆ لە پارلەمانی ئیسرائیل بەو ڕۆژنامەی ڕاگەیاندووە، ئێستا "کاتی هەنگاوی بە پەلەیە".
بەپێی سەرچاوەکانی "ئێکسپرێس":"خواستێک هەیە بۆ ئەوەی دەرفەتێک بە ترامپ بۆ گەیشتن بە ڕێککەوتنێکی قەبووڵکراو لەگەڵ ڕێژیمی ئێران بدرێت، کە پێش بە شەڕ بگرێت، بەڵام بژاردەی هێرشی نیزامی لەسەر مێزە، و کاتی بڕیاردان لەوبارەیەوە نزیک دەبێتەوە".
