وەزیری خەزێنەداریی دەوڵەتی ترامپ لەگەڵ نوێنەرانی ١٦ بانکی جیهانی و ڕێکخراوی جێبەجێکاری یاسای فێدێراڵ بۆ جێبەجێکردنی سزاکانی ئەمریکا بۆ سەر کۆماری ئیسلامی، بە مەبەستی کەمکردنەوەی ڕێژەی هەناردەکردنی نەوتی ئێران، کۆ بوویەوە.
ئێسکات بێسێنت، ڕۆژی چوارشەممە ١٣ی خاکەلێوە لەم کۆبوونەوەیەدا ڕایگەیاندووە کە دەوڵەتی دۆناڵد ترامپ گوشارە ئابوورییەکان تاکوو ئەو شوێنەی ڕێگەی هەبێت چڕتر دەکاتەوە تاکوو دەستڕاگەیشتنی ئێران بە سەرچاوە داراییەکان ئاڵۆز بکات.
بێسینت زیادی کردووە کە کۆماری ئیسلامی ئەم سەرچاوانە ڕادەستی حەماس و گرووپە میلیشیاکانی دیکە لە ڕۆژهەڵاتی نێوەڕاست دەکات و هەروەها و بۆ دەستپێڕاگەیشتن بە چەکی ئەتۆمی کەڵکی لێ وەردەگرێت.
ناوبراو پشتڕاستی کردووەتەوە کە ئەم سەرچاوانە بریتییە لە میلیاردها دۆلار کە ئێران ساڵانە لە ڕێگەی فرۆشی نەوتەوە دابینی دەکات.
وەزارەتی خەزێنەداریی ئەمریکا لە ڕەشەمەی ساڵی ڕابردوو ژمارەیەک نەوتهەڵگری نەوتی ئێران و پاڵاوگەیەکی لە چین سزا دا.
کۆمەڵێک پاڵاوگەی سەربەخۆ لە وڵاتی چین نەوتی قاچاخکراوی ئێران دەکڕنەوە بەڵام پاڵاوگە فەرمییەکانی سەر بە دەوڵەتی چین لە ترسی گەمارۆکانی ئەمریکا کڕینی نەوتی ئێرانیان ڕاگرتووە.
وەزیری خەزێنەداریی ئەمریکا جەختی لە سەر ئەوە کردووەتەوە کە کڕینی نەوتی ئێران لەلایەن ئەم پاڵاوگە بچووکانەوە، تاکە ڕێگەی دەربازبوونی ئابووریی کۆماری ئیسلامیی ئێرانە.
هەروەها ناوبراو هۆشداریی دایە بانکەکانی جیهان کە ئێران چالاکییەکانی خۆی لە ڕێگەی "تۆڕی بانکداریی لە سێبەردا" ئەنجام ئەدات و زیادی کرد کە هەموو ڕێکخراوە ماڵییەکانی جیهان دەبێت خۆیان لەهەمبەر کەڵکاژۆوەرگرتنی ئەم تۆڕە زیانبەخشە بپارێزن.
دەوڵەتی دۆناڵد ترامپ لە ئێستادا بۆ ڕاگرتنی بەرنامە ناوکییەکانی کۆماری ئیسلامی و هەروەها پشتیوانییەکانی ئەم ڕێژیمە لە میلیشیاکانی، سیاسەتی گوشاری هەمەلایەنەی گرتووەتە بەر.
بەپێی ئەم سیاسەتە، توندترین گەمارۆکان بەتایبەتی بۆ پێشگرتن بە فرۆشتنی نەوتی ئێران لەلایەن دەوڵەتی ئەمریکاوە لە ئارادایە.
