به‌رپرسێکی نیزامیی ئیسرائیل ڕایگه‌یاندووه، هێرشه‌کانی فڕۆکه شه‌ڕکه‌ره‌کانی ئیسرائیل له ساڵی ڕابردوودا بۆ سه‌ر سووریه، ئێران و عێراق، به‌ربه‌سته سه‌ره‌کییه‌کان یانی سیسته‌می به‌رگریی ئاسمانیی ده‌ستوپێوه‌ندییه‌کانی ڕێژیمی ئێرانی له ناوچه‌که به ته‌واوه‌تی له‌نێو بردووه و ئه‌مریکاش که خه‌ریکی ئاماده‌کاریی هێرش بۆ سه‌ر ئه‌و ڕێژیمه‌یه ئه‌وا به‌ربه‌ستێکی ئه‌وتۆی له‌سه‌ر ڕێگه‌دا نییه.
ڕۆژی چوارشه‌ممه، ١٣ی خاکه‌لێوه، سیاستوان و به‌رپرسانی نیزامیی ئیسرائیل له نێواخنی هه‌ڕه‌شه‌کانی ئه‌مریکا له دژی ئێران، بڵاویان کرده‌وه که ئه‌مریکا هه‌وڵ ده‌دات له ماوه‌ی حه‌فته‌ی داهاتوودا هێرشی به‌ربڵاو بکاته سه‌ر دامه‌زراوه ناوکییه‌کانی ئێران.
سه‌رچاوه‌یه‌کی باڵا له ده‌وڵه‌تی ئیسرائیل به بلاڤۆکی "دەیلی میلـ"ـی به‌ریتانیای وتووه: "ئه‌و کاره‌ی ئه‌مریکا زۆر له‌وه پێش ده‌بوایه بکرایه‌ت، کاتی ئه‌وه هاتووه که کۆتایی به‌و بابه‌ته بێنین".
ئه‌و به‌رپرسه ئیسرائیلییه له‌باره‌ی قسه‌کانی ترامپه‌وه وتوویه‌تی: "ئه‌و داواکارییه‌ی ترامپ شێتانه نییه. ئه‌و بابه‌ته بۆ سه‌قامگیری و ئیسرائیل جیهان زۆر گرنگ و جێگای سه‌رنجه".
هه‌روه‌ها به‌رپرسێکی دیپلۆماتکاری ئیسرائیلی له‌مه‌ڕ ئه‌گه‌ری هێرشی ئه‌مریکا بۆ سه‌ر ڕێژیمی ئێران ڕایگه‌یاندووه: "ئیسرائیل له سه‌ر ئه‌و بڕوایه‌دایه که گه‌ڕانه‌وه‌ی ترامپ بۆ کۆشکی سپی باشترین کات بۆ ڕووبه‌ڕووبوونه‌وه‌ی له‌گه‌ڵ ئێرانه".
هه‌روه‌ها ئه‌و به‌رپرسه وتوویه‌تی: "ده‌رفه‌تێکی دیکه وه‌کوو ئێستا پێش نایه‌ت".
