بەپێی ئامارە تۆمارکراوەکانی ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە ماوەی مانگی مارسی ٢٠٢٥دا پێشێلکردنی سیستماتیکی مافەکانی ژنان لە ئێران و ڕۆژهەڵاتی کوردستان بەردەوام بووە.
بەپێی ئەو ڕاپۆرتە لە ماوەی مانگی مارسی ٢٠٢٥دا سزای سێدارەی لانیکەم ۴ ژن لە زیندانەکانی ئێران جێبەجێ کراوە کە یەک کەسیان بە تۆمەتی پەیوەندیدار بە ماددە هۆشبەرەکان و سێ کەس بە تۆمەتی کوشتنی بە ئەنقەست سزای سێدارەیان بەسەردا سەپێندرابوو.
هەر لەو ڕاپۆرتەدا هاتووە کە لە ماوەی مانگی ڕابردووی زایینیدا، لانیکەم ١۷ چالاکی ژن لەلایەن ناوەندە ئەمنییەکانی ڕێژیمی ئێرانەوە دەسبەسەر کراون کە ۱۳.۵٪ی سەرجەم هاووڵاتییانی دەسبەسەرکراوی ئەو مانگە پێکدێنن.
هەروەها لانیکەم ۹ ژنی دەسبەسەرکراو واتا ۵۳٪ی کۆی گشتیی حاڵەتەکان، ژنانی چالاکی کورد بوون کە دەسبەسەر کراون.
ڕێکخراوی مافی مرۆڤی هەنگاو لە بەشێکی دیکەدا بڵاوی کردووەتەوە کە لە ماوەی مانگی مارسی ٢٠٢٥دا لانیکەم ۶ چالاکی ژن لە شارە جیاوازەکانی ئێران سەرجەم سزای ١۹ ساڵ و ١۱ مانگ و ۸ ڕۆژ بەندکرانیان بەسەردا سەپێندراوە.
هەروەها لە بەشێکی دیکەی ئەو ڕاپۆرتەدا هاتووە کە ۸ ژن لە شارە جیاوازەکانی ئێران کوژراون کە کوژرانی هەر ۸ کەسیان بە دەستی کەسانی نزیکی خۆیان وەکوو هاوژینەکەیانەوە ڕووی داوە.
لە سەرجەم ئەو ۸ حاڵەتی ژنکوژییەدا، لانیکەم ۵ حاڵەت بەهۆی کێشەی خێزانی ڕاگەیەندراون. هەروەها ۲ ژن بەهۆی ڕەتکردنی داوای هاوسەرگیری و یەک ژن بە هۆکاری نادیار کوژراوە.
