لە کاتێکدا کە ساڵانە لەگەڵ دەستپێکردنی سەفەری نەورۆزیدا ژمارەی ڕووداوەکانی ڕێگاوبان و قوربانییەکانیان بە شێوەیەکی کارەساتبارانەدا زیاد دەکات، بەرپرسانی ڕێژیم لە شاردنەوەی ئامارە ڕاستەقینەکانی مردن و برینداربوون بەردەوامن و هیچ هەنگاوێکی کاریگەر بۆ کەمکردنەوەی ئەو کارەساتانە ناگرنە بەر.
ڕاپۆرتێکی پۆلیسی هاتوچۆی فەراجای ڕێژیم نیشانی دەدات کە لە ماوەی ١٨ ڕۆژی نەورۆزدا ٧٤٧ کەس لە ڕووداوەکانی هاتوچۆدا گیانیان لەدەست داوە و زیاتر لە ١٦ هەزار و ٩٠٠ کەسیش بریندار بوون.
ئەم ئامارە بە بەراورد لەگەڵ هەمان ماوەی ساڵی ڕابردوو بە شێوەیەکی نیگەرانکەر زیادی کردووە، بەڵام هێشتا هیچ گۆڕانکارییەکی بەرجەستە لە سیاسەتەکانی سەلامەتی و پاراستنی ڕێگاوبان لە لایەن ڕێژیمەوە ڕووی نەداوە.
بە وتەی تەیموور حوسێنی، بەرپرسی پۆلیسی هاتوچۆی فەراجا، لە ماوەی ١٨ ڕۆژی نەورۆزدا، ٦١٥ ڕووداوی کوشندە لەسەر ڕێگاکانی ئێران ڕوویان داوە و لە ئەنجامدا ٧٤٧ کەس گیانیان لەدەست داوە.
لە سەرەتای دەستپێکردنی هەڵمەتی نەورۆزی لە ئێران لە ٢٥ی ڕەشەمەی ساڵی ڕابردووەوە، بە گشتی ٨٨ هەزار و ٤٨٩ ڕووداوی هاتوچۆ تۆمار کراون کە زیاتر لە ١٦ هەزار و ٩٠٥ هاووڵاتی بریندار بوون.
بەراوردکردنی ئەم ئامارانە لەگەڵ ساڵی ڕابردوودا نیشانی دەدات کە ژمارەی کوژراوانی ڕووداوەکانی هاتوچۆ ٤٩ کەس زیادی کردووە، بەڵام بەرپرسانی ڕێژیم لەبری وەرگرتنی بەرپرسایەتی و جێبەجێکردنی بەرنامەیەک بۆ پێشگرتن بەو ڕووداوانە، تەنیا خۆیان بە ڕاگەیاندن و بڵاوکردنەوەی ئامارەکانەوە گرێداوە.
حوسێنی وەک ساڵانی ڕابردوو هۆکاری ئەم ڕووداوانەی بە گرنگی نەدان بە ڕێگای پێشەوە و نەتوانینی کۆنتڕۆڵکردنی ماشین و گۆڕینی کتوپڕی ڕێڕەو و هەڵدێرانی ماشینی زانیووە بەڵام هیچ باسێکی لە خراپیی کوالێتیی ماشینە ناوخۆییەکان و خراپیی دۆخی ڕێگاوبانەکان نەکردووە کە ساڵانە بەو هۆیەوە هەزاران کەس گیانیان لەدەست دەدەن.
