عەلی لاریجانی، ڕاوێژکاری ڕێبەری کۆماری ئیسلامی، بە ئاماژەدان بە نامەی دۆناڵد ترامپ بۆ عەلی خامنەیی سەبارەت بە بژاردەی نیزامی لە ئەگەری نەبوونی وتوویژ، وتی: ئەگەر ئەمریکا یان ئیسرائیل "بە بیانووی ناوکی" ئێران بۆردومان بکەن، کۆماری ئیسلامی ناچار دەبێ بۆمبی ناوکی بەرهەم بهێنێت.
لاریجانی لە چاوپێکەوتنێکدا لەگەڵ دەنگوڕەنگی کۆماری ئیسلامی وتی: ''ئێمە توانامان هەیە، بەڵام فتوای خامنەیی ئەوەیە کە ئێمە بەرەو چەکی ناوکی ناڕۆین.''
ناوبراو وتی: ''کاری نیزامی لەگەڵ ئێران بێ دەرئەنجام نییە، ناوەڕۆکی نامەکەی ترامپ هەمان ئەو قسانەیە کە بە بەردەوامی دەیڵێت، قسەی ئەمریکاییەکان ورد نییە، چونکە زیانی بۆ ئەوان هەیە و کێشەی بۆ دروست دەکات".
ناوبراو ئاماژەی بەوەش کرد: ''وتووێژی ناڕاستەوخۆ بۆ تێگەیشتن لە داواکارییەکانی لایەنی بەرامبەر و ئیمتیازاتی لایەنی بەرامبەرە.''
ئەمە یەکەمجار نییە کە بەرپرسانی نزیک لە عەلی خامنەیی باس لە ئەگەری گۆڕینی ڕەوتی بەرنامەی ناوکیی کۆماری ئیسلامی و هەنگاونان بەرەو دروستکردنی چەکی ناوکی بکەن.
دوابەدوای چڕبوونەوەی هۆشدارییەکانی دۆناڵد ترامپ سەبارەت بە چالاکییە ناوچەیی و ناوکییەکانی تاران، ژمارەیەک میدیای سەر بە ڕێژیم، ئەگەری کاردانەوەی کۆماری ئیسلامییان لە بەرامبەر پێشهاتەکانی ئەم دواییە تاوتوێ کرد و کشانەوە لە NPT و پەرەپێدانی بەرنامەی ناوکی وەک بژاردەی بەردەست ناو بردووە.
هەروەها لە چەند مانگی ڕابردوودا ژمارەیەک لە ڕاوێژکارانی عەلی خامنەیی و فەرماندەکانی سپای پاسداران باسیان لە پێویستی یان ئەگەری گۆڕینی دوکتورینی ناوکیی کۆماری ئیسلامی کردووە.
