لە کاتێکدا کە خزمەتگوزارییەکانی فریاگوزاریی پێش نەخۆشخانە ڕۆڵێکی سەرەکی لە ڕزگارکردنی ژیانی هاووڵاتییان دەگێڕن، ڕاپۆرتەکان ئاماژە بە دۆخی نیگەرانکەری ژێرخانی فریاگوزاریی پارێزگای ئیلام دەکەن.
حەمید سەفەرپوور، بەرپرسی بەشی فریاکەوتنی پێش نەخۆشخانەی ئیلام، تێکچوونی ٢٨ بنکەی فریاکەوتنی لە پارێزگای ئیلامی ڕاگەیاند و جەختی لەوە کردەوە کە ئەو بنکانە پێویستیان بە نۆژەنکردنەوەی بەپەلە هەیە. ئەمەش لە کاتێکدایە کە لە کۆی گشتیی ٦٥ ئامبوڵانس کە لە پارێزگاکەدا بەردەستن، تەنها ٥٦ ئامبوڵانس خزمەتگوزاری پێشکەش دەکەن؛ ئامارێک کە بە ڕوونی ئاماژە بە توانای کەم و گوشار لەسەر فریاگوزاریی ئێستا دەکات.
خاڵێکی دیکەی نیگەرانکەر بارودۆخی بیناکانی بنکە فریاگوزارییەکانە، لە کۆی گشتیی ٤٩ بنکەی چالاک، تەنیا ١٣ بنکە بینای ستانداردیان هەیە.
بەرپرسی بەشی فریاکەوتنی ئیلام، لەحاڵێکدا باسی لە پێدانی مۆڵەت بۆ دروستکردنی ٢٠ بنکەی فریاگوزاری کردووە، کە ئەزموونەکانی ڕابردوو دەریانخستووە کە مۆڵەت بە تەنیا گەرەنتیی جێبەجێکردنی بەڵێنەکان نییە. ئەم پلانانە گرێدراوی تەرخانکردنی سەرچاوە و دابینکردنی ئامبوڵانس و ڕاکێشانی هێزی مرۆیی دەمێننەوە، لەکاتێکدا پێویستیی ئەم بنکانە "بە پەلەیە" نەک وردە وردە.
وەدرەنگخستنی نۆژەنکردنەوەی ناوگانی فریاگوزاری و بنکەکان دەتوانێت ببێتە هۆی تێچووی قەرەبوونەکراو بۆ خەڵک. ئەوەی ئێستا پێویستە تەنیا بەڵێن نییە، بەڵکوو هەوڵی کردەیی و تەرخانکردنی بوودجەی ڕاستەقینە و چاودێری وردە بۆ بەدیهێنانی بەرنامەکانی پەرەپێدانی فریاگوزاری ئیلام.
