نوێنه‌ری ڕێژیمی ئێران له ڕێکخراوی نه‌ته‌وه یه‌کگرتووه‌کان لێدوانه‌وه هه‌ڕه‌شه‌ئامێزه‌کانی ترامپی به بێ باکانه، دوژمنکارانه و پێشێلکردنی مافی نێونه‌ته‌وه‌یی و پڕەنسیپی جاڕنامه‌ی نه‌ته‌وه یه‌کگرتووه‌کان له‌قه‌ڵه‌م دا و له‌و بواره‌وه به‌نیسبه‌ت سه‌رۆککۆماری ئه‌مریکاوه سکاڵای تۆمار کرد.
ڕۆژی دووشه‌ممه ١١ی خاکه‌لێوه، جه‌یمز هۆیت به‌ڕێوه‌به‌ری پێوه‌ندییه‌کانی شۆرای ئاسایشی میللیی کۆشکی سپی، له وتووێژێک له‌گه‌ڵ ڕۆژنامه‌ی واشینگتۆن فری بیکندا ڕایگه‌یاند: "سه‌رۆککۆماری ئه‌مریکا به ڕوونی ڕایگه‌یاندووه که ڕێگه‌ی دیپلۆماسیی پێ باشتره، به‌ڵام ئه‌گه‌ر تاران درێژه به چالاکییه ناوکییه‌کانی خۆی بدات ده‌بێت چاوه‌ڕوانی ده‌رهاویشته‌ی جیددی بێت".
هه‌روه‌ها ئه‌میر سه‌عید ئه‌یره‌وانی، نوێنه‌ری ڕێژیمی ئێران له هه‌مان ڕۆژدا له دووتوێی نامه‌یه‌کدا بۆ سه‌رۆکی ده‌وره‌یی شۆرای ئاسایشی نه‌ته‌وه یه‌کگرتووه‌کان ئانتۆنیۆ گۆترێش، سه‌رۆکی گشتیی ڕێکخراوی نەتەوە یەکگرتووەکان نووسیویه‌تی: "ڕێژیمی ئیسلامی به‌نیسبه‌ت هه‌ر جۆره هه‌وڵێکی نیزامیی ئه‌مریکاوه هۆشداری جیددیی داوه و ڕایگه‌یاندووه لە بەرانبەر هه‌رجۆره هه‌وڵێکی ده‌ستدرێژیکارانه یان هێرشێک له‌لایه‌ن ئه‌مریکا و هاوپه‌یمانه‌کانی به‌تایبه‌ت ئیسرائیل له دژی ده‌سه‌ڵات و ته‌واویه‌تی خاک و به‌رژه‌وه‌ندییه‌کانمان، به زووترین کات و لێبڕاوانه دژکرده‌وه‌مان ده‌بێت".
هه‌ر له‌و پێوه‌ندییه‌دا ئه‌و نوێنه‌ره‌ی ڕێژیم وتی: "به‌رپرسایه‌تیی ته‌واوی لێکه‌وته کاره‌ساتباره‌که‌ی ئه‌و هه‌وڵه بێ باکانه له ئه‌ستۆی ئه‌مریکایه".
هه‌ر له‌و پێوه‌ندییه‌دا چه‌ند کاتژمێر دوای تۆمارکردنی سکاڵا له دژی ترامپ عه‌لی خامنه‌یی له لێدوانی خۆی له جێژینی ڕه‌مه‌زاندا وتی: "هه‌ڕه‌شه ده‌که‌ن که شه‌ڕمان له‌گه‌ڵ ده‌که‌ن، ئه‌گه‌ری زۆره له ده‌ره‌وه شه‌ڕمان له‌گه‌ڵ نه‌که‌ن و ئه‌گه‌ر شه‌ڕێکمان له دژ بکرێت ئه‌وا ئێمه‌یش ده‌سته‌وه‌ستان ناوه‌ستین".
شایانی باسه ڕێبه‌ری ڕێژیم له لێدوانه‌که‌یدا ترسێکی له‌ڕاده‌به‌ده‌ری له‌مه‌ڕ سه‌رهه‌ڵدانی خه‌ڵکی ئێران پێوه دیار بووه و وتوویه‌تی: "ئه‌گه‌ر دوژمنان بیر له‌وه بکه‌نه‌وه که له نێوخۆ کارێک بکه‌ن ئه‌وا ئێمه‌یش له ڕێگه‌ی خه‌ڵکه‌وه وڵامیان ده‌ده‌ینه‌وه".
