ڕۆژنامەی "واڵ ستریت ژۆرناڵ" لە زاری بەرپرسانی ئەمریکاییەوە بڵاوی کردووەتەوە، واشنگتۆن بە گوشار خستنەسەر تاران خوازیاری دەستپێکردنی دانوستانی ڕاستەوخۆ لەسەر پرسی ناوکییە.
بەپێی ئەم ڕاپۆرتە، ئامانجی دەوڵەتی ترامپ لەم دانوستانانەدا سنووردارکردنی بەرنامە ناوکییەکەی تاران نییە، بەڵکوو ئەوەیە کە بە ڕێککەوتنێکی گەورەتر لە ڕێککەوتنی ساڵی ٢٠١٥ بگەن و بەرنامە ناوکییەکەی ئێران بە تەواوی لە ماوەیەکی کورتدا ڕابگیرێت.
حەفتەی ڕابردوو بەرپرسانی ئێران چەندین جار ڕایانگەیاندبوو کە تەنیا ئامادەن دانوستانی ناڕاستەوخۆ لەگەڵ ئەمریکا بکەن، بەڵام دۆناڵد ترامپ ڕۆژی پێنجشەممە ڕایگەیاند کە بەرپرسانی ئێران خۆیان دەیانەوێت دانوستانی ڕاستەوخۆ بکەن.
بەرپرسێکی باڵای ئەمریکا بە ڕۆژنامەی واڵ ستریت ژۆرناڵی ڕاگەیاندووە، ئیدارەی ترامپ نایەوێت گفتوگۆی ناڕاستەوخۆ بکات کە هەر دوولا "ماوەی چەند مانگێک لە نهۆمە جیاوازەکانی هۆتێلێکدا پەیام ئاڵوگۆڕ بکەن"، بەڵکوو بە دوای گفتوگۆی ڕاستەوخۆی نێوان بەرپرسانی باڵای هەر دوو وڵاتدایە.
ڕیچارد نێفیو، یەکێک لە بەرپرسە باڵاکانی دەوڵەتی پێشووی ئەمریکا لە دانوستان لەگەڵ ئێران بە ڕۆژنامەی واڵ ستریت ژۆرناڵی ڕاگەیاندووە، ئێران هەمیشە هەوڵ دەدات بە کەڵکوەرگرتن لە دانوستانەکان گوشارەکان کەم بکاتەوە و بەرنامە ناوکییەکەی بپارێزێت.
ئەم ڕۆژنامەیە لە درێژەدا نووسیویەتی کە ئیسرائیل لە هێرشەکانی ئەم دواییەیدا بەشێکی زۆری بەرگریی ئاسمانیی ئێرانی لەناو بردووە و هێزە هاوپەیمانەکانی ئێرانی لە ناوچەکە لاواز کردووە؛ پرسێک کە ڕەنگە تاران ناچار بکات ویستەکانی ئەوان قەبووڵ بکات.
