غوڵامحوسێن موحسێنی ئێژەیی، سەرۆکی دەزگای دادوەریی ڕێژیم، ڕۆژی پێنجشەممە هەواڵی مردنی حوسێنعەلی نەیێری، یەکێکی دیکە لە دادوەرەکانی ناسراوە بە "هەیئەتی مەرگ"ـی، ڕاگەیاند.
پێشتر و لە کاتی کوژرانی دوو دادوەری دیوانی باڵای ڕێژیم، واتا عەلی ڕازینی و محەممەد مۆقیسە لە کۆتاییەکانی مانگی بەفرانباری ساڵی ڕابردوودا، باس لەوە کرابوو کە " نەیێری "ـش لەم ڕووداوەدا بریندار کراوە.
نەیێری لە کاتی لەسێدارەدانە بەربڵاوەکانی دەیەی ٦٠ی هەتاوی بە حوکمی ڕاستەوخۆی خومەینی وەک حاکمی شەرعی بەندیخانەی ئێڤین دیاری کرابوو.
ناوبراو هاوکات لەگەڵ مورتەزا ئێشراقی، داداستانی ئەوکاتی تاران، ئیبراهیم ڕەئیسی، جێگری دادستان و مستەفا پوورمحەممەدی، نوێنەری وەزارەتی ئیتلاعاتی ڕێژیم لە بەندیخانەی ئێڤین، هەزاران بەندکراوی سیاسییان بەهۆی دژایەتی لەگەڵ کۆماری ئیسلامی لە سێدارە دا.
نەیێری ساڵی ٢٠١٩ی زایینی لەلایەن ڕێکخراوی لێبوردنی نێونەتەوەییەوە بە تاوان بە دژی مرۆڤایەتی، تۆمەتبار کرا.
پاش بڵاوبوونەوەی هەواڵی مردنی نەیێری، چالاکوانانی سیاسی سەبارەت بە ڕۆڵی ناوبراو لەسێدارەکانی دەیەی ٦٠ کاردانەوەیان هەبوو.
بەشێکی زۆر لە چالاکوانان لە تۆڕە کۆمەڵایەتییەکاندا مردنی نەیێرییان بە دەرفەتێک بۆ وەبیرهێنانەوەی ڕۆڵی ناوبراو لە تاوانەکانی دەیەی ٦٠ و دواتری کۆماری ئیسلامی زانی.
پێشتر لە فایلیکی دەنگیی بڵاوەکراودا، حوسێنعەلی مونتەزێری لە ڕێکەوتی ٢٤ی گەلاوێژی ساڵی ١٣٦٧ی هەتاوی لە دانیشتنێک لەگەڵ ئێشراقی، نەیێری، پوورمحەممەدی و ڕەئیسی دەڵێت: "بە بروای من گەورەترین تاوان کە تاکوو ئێستا لە ژێر دەسەڵاتی کۆماری ئیسلامیدا ڕووی داوە و لە داهاتوویشدا بە هۆیەوە وەک تاوانباران لە مێژوودا دەمانووسنەوە، بە دەستی ئێوە ئەنجام دراوە".
