کتێبی "نەتەوەسازی" لە نووسینی کاک عەبدوڵڵا حیجاب چالاکی سیاسیی کورد کە باس لە تێپەڕبوون لە ناسنامەی ئێتنیکییەوە دەکات لە ماوەی ڕۆژانی ڕابردوودا چاپ و بڵاو کرایەوە.
لە بەشێکی ئەو کتێبەدا باس لە لێکۆڵینەوەیەکی بەراوردکارانەی خەباتی نەتەوەی کورد لەپێناو ناسنامە و مافی نەتەوەیی لە دوو قۆناغی جیاوازی مێژووییدا کراوە.
یەکەم قۆناغ بەو تێکۆشان و ڕاپەڕینانە دەست پێ دەکات کە لە نێوان ساڵەکانی پاش شەڕی جیهانی یەکەم لە سەرەتای سەدەی بیستەمدا هاتەگۆڕێ و بە شکانی ڕاپەڕینەکان لە کۆتایی بیستەکانی هەمان سەدەدا سەرکوت کرا.
قۆناغی دووهەم باسی ڕاپەڕین و گەشەی بزووتنەوەی نەتەوەیی کوردستان لە دوایین دەیەی هەمان سەدەدا دەکا.
هەروەها لەو کتێبەدا لە دوتوێی لێکۆڵینەوەیەکدا، بەپێی فاکتۆرە سەرەکییەکانی نەتەوەسازی، سەرتا تیشک خراوەتە سەر هۆکارەکانی بە ئەنجام نەگەیشتنی خەباتی کورد لەپێناوی ناسنامەی سەربەخۆ لە کاتە هەستیارەکانی گۆڕان لە ڕۆژهەڵاتی نێوەڕاست لە ساڵەکانی پاش شەڕی یەکەمی جیهانیدا و پاشان باسی ئاڵوگۆڕ لەو گۆڕەپانەدا دەکرێ کە بە شێوەی گشتی و بەپێی تێئۆری زانستی و بەڵگە مێژووییەکان، بۆ گەشەکردن و بە ئەنجامگەیشتنی بزووتنەوە نەتەوەییەکان یا مسۆگەرکردنی سەروەریی نەتەوەیی پێویستن .
هەروەها باس لەوە کراوە کە لە ژێر ڕووناکایی ئەو ئاڵوگۆڕانەدا، نیشانەکانی گەشەکردنی ڕەوتی نەتەوەسازی لە کوردستان لە کۆتاییەکانی سەدەی بیستەمدا، تێپەڕبوونی بزووتنەوە لە چوارچێوەی ئێتنیکییەوە بۆ قۆناغی بەجەماوەری بوون و نزیکبوونەوە لە ئامانجەکانی کە شکڵ پێدانی ناسنامەی هاوبەشی نەتەوییە شی کراونەتەوە.
شایانی باسە کاک عەبدوڵڵا حیجاب نووسەری ئەو کتێبە ڕایگەیاندووە کە ئەو کتێبەی بە یادی هاوڕێیانی شەهید و ڕێنیشاندەری "شەهید عەلی کاشفپوور و شەهید عەبدوڵڕەحمان ئەنساری" بووە و هەروەها پێشکەشی هەموو ئەو کەسانەی کردووە کە لەپێناو سەربەستیی کوردستان و مافی یەکسانی بۆ هەموو مرۆڤەکان، تێکۆشانیان کردووە و گیانیان بەخشیوە.
ئەم کتێبە تێزی ماستەری ناوبراو لە زانكۆی ئۆسلۆ، بەشی زانستە کۆمەڵایەتییەکان و بەشی زانستە سیاسییەکان بووە و لە ئێستادا چوارچێوەی کتێبێکدا خۆی نواندووە.
ئەم بەرهەمە لەلایەن وەشانخانەی ٤٩ کتێب لە سوید بۆ یەکەم جار چاپ و بڵاو کراوەتەوە.
