شۆرای دێموکراتیکی سووریە، دەوڵەتی نوێ و یاسای بنەڕەتیی سووریەی بە بەرهەمهێنانەوەی ئۆتۆریتە بۆ جارێکی دیکە لە قەڵەم داوە و ڕەتی کردوەتەوە.
شۆرای دێموکراتیکی سووریە ڕۆژی یەکشەممە ١٠ی خاکەلێوە ڕایگەیاندووە، جاڕنامەی نوێی سووریە بە بڕەودان بە دەسەڵاتی جێبەجێکار، سنووردارکردنی چالاکییە سیاسییەکان و سڕینەوەی گرووپە ئیتنیکییەکان و ژنان، ڕێگەی دیکتاتۆری پێشووی گرتووەتە بەر.
باڵی سیاسیی هێزەکانی سووریەی دێموکرات، کابینە نوێیەکەی ئەحمەد شەرع بە کابینەیەکی فرەچەشن کە نوێنەرایەتیی هەموو پێکهاتەکانی سووریە بکات، نازانێت و جەختی لە سەر ئەوە کردووەتەوە کە هەر دەوڵەتێک ڕەنگدانەوەی فرەچەشنی و جیاوازییەکان لە سووریەی تێدا نەبێت، ناتوانێت دەسەڵاتدارییەکی گونجاو بۆ ئەم وڵاتە بێت.
ئەحمەد شەرع ڕۆژی شەممە ٩ی خاکەلێوە کابینەی دەوڵەتی نوێی لە سووریە ڕاگەیاند.
کابینەکەی ئەحمەد شەرع لە ٢٣ کەس پێکهاتووە کە تەنیا یەک کەسی کوردی تێدایە کە ئەویش لە حکوومەتی نوێی سووریەوە نزیکە تاکوو هێزەکانی سووریەی دێموکرات.
هەموو ئەمانە لەکاتێكدایە کە پێشتر ئەحمەد شەرع ڕێککەوتنێکی لەگەڵ مەزڵووم عەبدی، فەرماندەی گشتیی هێزەکانی سووریەی دێموکرات واژۆ کردبوو.
بەپێی ئەو ڕێککەوتنە بڕیار بوو کە حکوومەتی نوێی سووریە دان بە مافەکانی نەتەوەی کورد لە سووریەدا بنێت و هەروەها لە ڕەوتی دەسەڵاتداریی داهاتووی سووریە بەشداریان بکات.
هەروەها ئەحمەد شەرع پێشتر یاسای بنەڕەتیی نوێی سووریەی واژۆ کردبوو کە بە بڕوای کارناسان ئەم یاسایە دەسەڵاتێکی بەربڵاو و ئاوەڵا بە ناوبراو لە بواری دیاریکردنی بەرپرسانی باڵای دەزگای یاسادانەر و دادوەریی وڵات، دەبەخشێت.
