بەپێی ئامارێک کە لەلایەن بەشی ئاماری ڕێکخراوی مافی مرۆڤی هەنگاوەوە بڵاو کراوەتەوە، لە ماوەی یەک مانگی ڕابردوودا لانیکەم ٥٨ زیندانی لە زیندانەکانی کۆماری ئیسلامی ئێران لە سێدارە دراون. ئەم ڕێژەیە بەلایەنی کەمەوە بە بەراورد بە مانگی مارسی ساڵی ٢٠٢٤ ، ٤٠ حاڵەت زیادی کردووە کە دەکاتە ٢٢٢٪، لە مانگی مارسی ساڵی ڕابردوودا ١٨ زیندانی لە سێدارە درابوون.
بە پێی ئەم ڕاپۆرتە، لانیکەم چوار ژن لە زیندانەکانی مەشهەد، ئیسفەهان، و ورمێ لە سێدارە دراون، کە سێ کەسیان بە تاوانی کوشتن و یەکێکیان بە تاوانی پێوەندیدار بە ماددە هۆشبەرەکان سزای لە سێدارەدانیان بەسەردا سەپێنرابوو.
هەروەها شایانی باسە، لە کۆی گشتیی ٥٨ زیندانی کە لە مانگی مارسدا لە سێدارە دراون، هیچیان لە سەرچاوە فەرمییەکانی ئێران یان ماڵپەڕە پەیوەندیدارەکان بە دەسەڵاتی دادوەرییەوە ڕانەگەیەندراوە. هەروەها سزای لەسێدارەدانی ٤ زیندانی بە نهێنی و بەبێ ئاگاداریی بنەماڵەکانیان یان بە بێ پێدانی مافی دوایین چاوپێکەوتن لەگەڵ بنەماڵەکەی جێبەجێ کراوە.
بەپێی ئەم ڕاپۆرتە لە ماوەی مانگی مارسدا لانیکەم ١٨ بەندکراوی فارس لە زیندانەکانی ئێران لە سێدارە دراون کە ئەمە یەکسانە بە ٣١٪ هەروەها ١٤ زیندانی تورک کە یەکسانە بە ٢٤٪ی کۆی گشتی لە سێدارە دراوان.
هەروەها لە مانگی مارسدا زۆرترین لەسێدارەدان پێوەندی بە تاوانی ماددە هۆشبەرەکانەوە بووە، کە ٣٠ حاڵەت بووە و کوشتنی بە ئەنقەستیش ٢٨ حاڵەت بووە.
