ڕۆژی شەممە ١٣ی بانەمەڕ، کۆبوونەوەی ئینتێرناسیۆناڵ سۆسیالیست بۆ پێکهێنانی کۆمیتەی کوردان بە بەشداریی چەند حیزب و لایەنی سیاسی لە شاری سلێمانی بەڕێوە چوو.
هەیئەتێکی حیزبی دێموکراتی کوردستانی ئێران بە سەرپەرستیی کاک محەممەدنەزیف قادری، ئەندامی دەستەی کارگیڕیی حیزبی دێموکرات بەشداری ئەم کۆبوونەوەیە بوون.
ئەم حیزب و لایەنە سیاسییانەی کە لەم کۆبوونەوەیەدا بەشدار بوون، بریتی بوون لە: حیزبی دێموکراتی کوردستانی ئێرا ن،پارتی یەکێتی دیموکرات، یەکێتی نیشتیمانی کوردستان، پارتی دێموکراتی کوردستان، پارتی یەکسانی و دێموکراتی گەلان، کۆمەڵەی زەحمەتکێشانی کوردستان، کۆمەڵەی شۆڕشگێڕی زەحمەتکێشانی کوردستانی ئێران، کۆمەڵە ڕێکخراوی کوردستانی حیزبی کۆمۆنیستی ئێران .
لەم کۆبوونەوەیەدا بە تێکڕا بڕیار لەسەر کاراکردنەوەی کۆمیتەی کوردی لە چوارچێوەی ڕێکخراوی ئینتێرناسیۆناڵ سۆسیالیست بە ئامادەبوونی هاوڕێیانی ئەم ڕێکخراوە درا کە بریتی بوون لە:
ـ شانتاڵ کامبیوا: ڕێکخەری جیهانیی ڕێکخراوی ئینتێرناسیۆناڵ سۆسیالیست،
ـ ئیرۆ هاینالۆوما: بەرپرسی کۆمیتەی سیفاک،
ـ پاولینا لامپس: بەرپرسی کۆمیتەی ئێتیک،
ـ هانا جەلول: ئەندام پەرلەمانی ئورووپا- جێگری بەرپرسی پەیوەنییەکانی دەرەوەی ئورووپا.
لە کۆبونەوەکەدا حیزبە کوردستانییەکان بە کۆدەنگی جەختیان لە ڕاپەڕاندنی کاری پێویست بۆ پاراستنی مافی نەتەوەیی گەلی کورد و پەرەپێدان بە پرۆسەی ئاشتی و دێموکراسی و یەکسانی و پارێزگاریکردن لە یەک وتاریی نەتەوەی کورد لە ناو چوارچێوە و کار و پرەنسیپی ئینتێرناسیۆناڵ سۆسیالیست کردەوە.
هاوکات بڕیار بۆ برەودان بە مافە سیاسییەکانی گەل و نەتەوەکەمان درا.
لە بەشیکی کۆبوونەوەکەدا بە تێروتەسەلی لەسەر ڕێنماییەکانی شێوازی کارکردنی کۆمیتەی کوردی گفتوگۆ کرا و بە تێکڕا بابەتەکە پەسەند کرا.
لەم کۆبوونەوەیەدا بڕیار درا بۆ دەستنیشانکردنی شوێن و کاتی گونجاو بۆ بەستنی کۆنفرانسی کۆمیتەی کوردی بە زووترین کات کاری جیددی بکرێت.
