بەپێی ڕاپۆرتی میدیا ئیسرائیلییەکان، ئەمڕۆ پێنجشەممە ٢٩ی جۆزەردان، کۆماری ئیسلامی لە هێرشێکدا بۆ سەر شاری بێئرشێبع لە باشووری ئیسرائیل و لە ڕێگەی مووشەکی بالستیکەوە نەخۆشخانەیەکی کردە ئامانج.
ڤیدیۆ بڵاوکراوەکان باس لە بەرکەوتنی خەساری زۆر لە نەخۆشخانەکە دەکەن بەڵام تاکوو ئێستا ئامارێک لە ژمارەی بریندار و کوژراوان لەبەر دەستدا نییە.
بەرپرسێکی ئیسرائیلی لەمبارەوە ڕایگەیاندووە کە کۆماری ئیسلامی دەیان مووشەکی ئاراستەی ئەم نەخۆشخانەیە کردووە و خەڵکی سێڤیلی کردوونەتە ئامانج.
لێبوردنی نێونەتەوەیی ڕۆژی ڕابردوو بە پشتبەستن بە ئامارە بڵاوکراوەکانی هەر دوو وڵاتەکە سەبارەت بە ڕێژەی کوژراو و برینداربووانی شەڕەکە، داوای لێ کردن کە پێبەندی پرەنسیپە مرۆڤدۆستانەکان بن و گیانی هاووڵاتییانی سێڤیل بپارێزن.
