بەپێی ڕاپۆرتی کەمپەینی چالاکانی بەلووچ، ڕۆژی پێنجشەممە ٢٩ی جۆەزەردان، تۆماج ساڵحی، هونەرمەندی ڕەپێری ناڕەزای لە دوورگەی کیش دەسبەسەر کرا.
تۆماج ساڵحی پێشتر لەکاتی بزووتنەوەی ''ژن، ژیان، ئازادی''دا دەسبەسەر کرابوو و دواتر بە تۆمەتی وەک پڕوپاگەندە دژی ڕێژیم و "افساد فی‌الارض" سزا درابوو، بەڵام هێندێک لە حوکمەکانی لەوانە حوکمی لەسێدارەدان دوای پێداچوونەوە هەڵوەشایەوە.
لە لایەکی دیکەوە ڕێکخراوی مافی مرۆڤی هەنگاو لە ڕاپۆرتێکدا بڵاوی کردەوە کە دوابەدوای پەرەسەندنی ئاڵۆزییەکان و درێژەی شەڕی ئێران و ئیسرائیل، دامودەزگا ئەمنییەکانی کۆماری ئیسلامی شەپۆلێکی بەربڵاوی دەسبەسەرکردنی سەرەڕۆیانەیان لە شارە جۆراوجۆرەکان دەست پێ کردووە.
بەپێی ئەو ڕاپۆرتە ئەم دەسبەسەرکردنانە کە لە ٢٨ی جۆزەردانی ١٤٠٤ گەیشتوونەتە لووتکە، بەشێوەیەکی سەرەکی هاووڵاتییانی ئاسایی و بەکارهێنەرانی تۆڕە کۆمەڵایەتییەکانی کردووەتە ئامانج و تۆمەتی وەک "سیخوڕیکردن بۆ مووساد"، "پشتیوانی میدیایی بۆ ئیسرائیل" و "تێکدانی ڕای گشتی"یان دراوەتە پاڵ.
