لە درێژەی هەوڵە دیپڵۆماتیکەکان دوای ڕاگەیاندنی ئاگربەست لە نێوان کۆماری ئیسلامی و ئیسرائیل، ڕێبەرانی سێ وڵاتی ئورووپایی داوایان لە تاران کرد بگەڕێتەوە سەر مێزی دانوستانە ناوکییەکان لەگەڵ ئەمریکا.
ئێمانوێل ماکرۆن، سەرۆککۆماری فەرانسە، کێەر ستارمەر، سەرۆکوەزیرانی بریتانیا و فریدریش مێرتز، ڕاوێژکاری ئاڵمان، ڕۆژی سێشەممە ٣ی پووشپەڕ، لە پەراوێزی کۆبوونەوەی ڕێکخراوی پەیمانی باکووری ئاتڵانتیکی باکوور ( ناتۆ) لە شاری لاهە، داوایان لە کۆماری ئیسلامی کرد کە ڕەوتی وتووێژ و دیپلۆماسی بگرێتە بەر.
سێ ڕێبەری ئورووپایی لە دیدارێکی هاوبەشدا باسیان لە بارودۆخی ناسەقامگیری ڕۆژهەڵاتی ناوەڕاست کرد و ڕایانگەیاند کە دوای وەستانی کاتی شەڕ و پێکدادانەکانی نێوان ئێران و ئیسرائیل، ئێستا کاتی ئەوە هاتووە تاران بۆ دانوستانەکان بگەڕێتەوە.
بەپێی ڕاپۆرتی ڕۆژنامەی ''لۆفیگارۆ''ی فەرانسە، ڕێبەرانی ئورووپایی جەختیان لەوە کردووەتەوە کە بەردەوامیی گرژییەکان نەک تەنیا ناوچەکە بەڵکوو هەڕەشە لە ئەمنییەتی جیهان دەکات و تەنیا ڕێگای چوونە پێش ئەوەیە کە کۆماری ئیسلامی دەستبەجێ بگەڕێتەوە سەر مێزی دانوستانی ناوکی.
