ستیڤێن ویتکاف، نوێنەری تایبەتی سەرۆککۆماری ئەمریکا بۆ وتووێژە ناوکییەکان لەگەڵ کۆماری ئیسلامی، باسی لە ئەگەرەکانی دەسپێکردنەوەی وتوویژەکانی لەگەڵ کۆماری ئیسلامی کردووە.
ویتکاف لە وتووێژێک لەگەڵ کاناڵی "سی ئێن ئێن"، وتی: "هیوادارم کە ڕێککەوتنێکی ئاشتیخوازانە و گشتگیر لەگەڵ ئێران واژۆ بکەین و ڕای من ئەوەیە کە ئێران لە ئێستادا بۆ ئەم ڕێککەوتنە ئامادەیە".
کۆماری ئیسلامی پاش هێرشی ئیسرائیل بۆ سەر بنکە سەربازی و ئەتۆمییەکانی و هەروەها کوشتنی سەدان فەرماندەی باڵا و کەسایەتیی گرینگی بەرنامە ناوکییەکانی، ئاگربەستی پەسەند کرد.
بەپێی زانیارییەکان، تاران پاش ئەم هێرشانە و هەروەها هێرشی ئەمریکا بۆ سەر بنکە ئەتۆمییەکانی، ئامادەیە تاکوو وتووێژە ناوکییەکان لەگەڵ ئەمریکا بۆ گەیشتن بە ڕێککەوتن دەست پی بکاتەوە.
ئیسرائیل و ئەمریکا هەڕەشەیان لە ڕێژیم کردووە کە ئەگەر بەرنامە ئەتۆمی و مووشەکییەکانی دەست پێ بکاتەوە، بۆ جارێکی دیکە هەڵدەکوتنەسەر بنکە هەستیارەکانی و چیدیکە ڕێگەی پێ نادەن ئەم بەرنامانە پەرە پێ بدات.
