بەپێی ڕاپۆرتە بڵاوکراوەکان لە بەندیخانەی تارانی گەورەوە، بەندکراوانی ئەم بەندیخانەیە بۆ ماوەی سێ ڕۆژە کە ئاوی خواردنەوەی شیرینیان دەست ناکەوێ.
دەوترێت ئاوی ئەم بەندیخانەیە سوێرە و بەندکراوان بۆ دروستکردنی چای و خواردن هەر لەو ئاوە کەڵک وەردەگرن بەڵام بۆ خواردنەوە ناچارن ئاوی مەعدەنی بکڕن.
بە وتەی سەرچاوەکان، ئاوی مەعدەنیی نێو بەندیخانەکە تەواو بووە و بەندکراوان سێ ڕۆژە لە دەستڕاگەیشتن بە ئاوی خواردنەوەی شیرین بێبەری کراون.
زۆربوونەوەی حەشیمەتی بەندکراوان لەم بەندیخانەیە، هۆکاری سەرەکیی کەمبوونەوەی پێداویستییەکانی بەندکراوانە.
لە ڕۆژانی ڕابردوودا و لە گەرمەی شەڕی ئیسرائیل و کۆماری ئیسلامیدا، ئەرتەشی ئیسرائیل هێرشی کردە سەر بەندیخانەی ئێڤین و بەم هۆیەوە ژمارەیەکی زۆر لە بەندکراوان بۆ بەندیخانەی تارانی گەورە ڕاگوێزران.
جیا لە کەمبوونی پێداویستییەکی وەکوو ئاو، بچووکبوونی ژوورەکان و زۆربوونی حەشیمەتی بەندکراوان بەتایبەت لەم وەرزی گەرمایەدا، کێشەی بۆ بەندکراوان دروست کردووە.
