ڕۆژنامەی ئورشەلیم پۆستی ئیسرائیل لە ڕاپۆرتێکدا بڵاوی کردووەتەوە کە هێزەکانی ئەرتەشی ئیسرائیل بۆ دەسبەسەرکردنی ژمارەیەک لە ئەندامانی لقی قودسی سپای پاسداران، بە مەودای ١٠ کیلۆمیتر چوونەتە نیو قووڵایی خاکی سووریەوە.
ئەم ڕۆژنامەیە لە زاری فەرماندەیەکی ئەرتەشی ئیسرائیلەوە هێناویەتی کە لەم ئۆپەراسیۆنەدا بەبێ تەقاندنی هیچ فیشەکێک، ئەندامانی لقی قودسی سپای پاسداران کە ئامادەکارییان بۆ هێرشکردنەسەر هێزەکانی ئیسرائیل لەو ناوچەیەدا کردووە، دەسبەسەر کراون.
بەپێی ئەم ڕاپۆرتە، هێزەکانی ئیسرائیل بە بێدەنگی لە ڕووباری "ڕەقاد"ـەوە دەچنە نێو گوندێک لە خاکی سووریە و پاشان لە چەند گرووپی جیاجیادا هێرش دەکەنە سەر چەند خانوو کە ئەندامانی سپای تێدا جێگیر کراون و دواتریش بەبێ ئەوەی کە هیچ تێکهەڵچوونێک لە گوندەکەدا ڕوو بدات، دەسبەسەرکراوان دەبرێنە نێو خاکی ئیسرائیلەوە.
