بەداخ و کەسەرێکی زۆرەوە ئێوارەی ڕۆژی یەکشەممە ٥ی گەلاوێژ چیاکۆ یووسفی‌نژاد و ئەوڕۆ دووشەممە ٦ی گەلاوێژ، خەبات ئەمینی تێکۆشەرێکی دیکەی ژینگەپارێزی نیشتمان بەهۆی قووڵی برینەکانیانەوە شەهید بوون و تێکەڵ بە کاروانی شەهیدانی ژینگەپارێزی نیشتمان بوون. هەروەها چەند ڕۆژ پێشتریش پارێزەری دڵسۆز، حەمیدی مورادی گیانی خۆی لەو ڕێگایەدا پێشکەشی نیشتمانەکەی کردبوو.
بێ‌گومان بەرپرسایەتیی ڕووداوگەلێکی وەها و کوژاندنەوەی ئاگرگرتنە گوماناوییەکانی شاخ و کێو و دارستانەکانی کوردستان بە پلەی یەکەم لە ئەستۆی کۆماری ئیسلامییە بەڵام کۆماری ئیسلامی وەکوو پیشەی هەمیشەیی خۆی، ئەوەی بەلایەوە گرینگ نییە پاراستنی ژینگەی کوردستانە و لە ئاکامی ئەوەدایە کە ڕۆڵەکانی نیشتمانەکەمان قۆڵی هیممەتی لێ هەڵدەماڵن و بەوپەڕی دڵسۆزی و هەست بە بەرپرسایەتیکردنەوە بە بێ هیچ ئیمکاناتێک بۆ پاراستنی نیشتمانەکەمان بە گژ ئاو و ئاگردا دەچن و لە گیانی خۆیان مایە دادەنێن.
ناوەندی تەشکیلاتی حیزبی دێموکرات وێڕای دەربڕینی داخ و کەسەر بە بۆنەی شەهیدبوونی ئەم سێ لاوە شەهیدەی وڵاتەکەمان، سەرەخۆشی لە بنەماڵە بەڕێزەکانیان، خەڵکی کوردستان، ژینگەپارێزانی دەروەست و خەڵکی شاری سنە دەکا و هیوای چاکبوونەوەی خێرا بۆ زامدارانی ئەم ڕووداوە تاڵە بە ئاوات دەخوازێت.
شیاوی ئاماژە پێکردنە شەهید چیاکۆ یووسفی‌نژاد هاوکات لەگەڵ ئەوەی تێکۆشەرێکی ژینگەپارێز و وەرزشکارێکی سەرکەوتوو بوو، ئەندامێکی چالاکی حیزبی دێموکراتی کوردستانی ئێران لە ناوخۆی وڵات بوو.
سڵاو لە گیانی پاکی سێ شەهیدی نوێی گەلەکەمان حەمید مورادی، چیاکۆ یووسفی‌نژاد و خەبات ئەمینی.
ناوەندی تەشکیلاتی نهێنیی حیزبی دێموکراتی کوردستانی ئێران
٦ی گەلاوێژی ١٤٠٤
