بڵاڤۆکی بریتانیایی "تیلێگراف" لە دووتوێی ڕاپۆرتێکدا باسی لەوە کرد کە دوای کوژرانی دەیان زانای ناوکیی کۆماری ئیسلامی لە ڕەوتی شەڕی ١٢ ڕۆژەدا، ڕێژیمی تاران زانا ناوکییەکانی دیکەی بۆ شوێنی ئەمن و حەشارگەکان ڕاگواستووە.
"تیلێگراف" لەو ڕاپۆرتەدا لە زاری بەرپرسێکی پلەبەرزی ڕێژیمەوە بڵاوی کردەوە کە زۆربەی زانایانی ناوکیی ڕێژیم ناوێرن لە ماڵی خۆیاندا بمێننەوە و بۆ ئەو مەبەستەش بۆ شوێنی دیکە وەکوو حەشارگەکانی تاران و ویلاکانی باکووری ئێران ڕاگوێزراون.
ئەو بەرپرسەی ڕێژیم بە "تێلێگرافیـ"ـی وتووە کە ئەو ڕێوشوێنە ئەمنییانە ئەو زانا ناوکییانەش کە لە زانکۆکان وانە دەڵێنەوەی گرتووەتەوە و بە جێگەی ئەوان کەسانێکیان داناوە کە هیچ پێوەندییەکیان بە بەرنامەی ناوکییەوە نییە.
ئەو هەوڵە ئەمنییەتییانەی ڕێژیم لەکاتێکدایە کە ئەگەری هەڵگیرسانی دووبارەی شەڕ و هێرشی لەناکاوی دیکەی ئیسرائیل لەئارادایە.
لەو پێوەندییەدا کارناسانی ئیسرائیلی بە "تێلێگرافــ"ـیان ڕاگەیاندووە کە هەرچەند زانایانی ناوکیی کۆماری ئیسلامی کە لە ئیستادا لە ناوەندە ئەمنەکاندا لەژێر چاوەدێریی ورد و پاراستنی چڕی ناوەندە ئەمنییەییەکاندان، بەڵام لە ئامانجە سەرەکییەکانی ئیسرائیلن.
هەر لەو پێوەندییەدا ڕۆنێن سۆلۆمون، شرۆڤەکاری هەواڵگری و بەرگریی ئیسرائیل بەو بڵاڤۆکەی ڕاگەیاندووە: "ئەو زانا ناوکییەکانی ئێران لە ئێستادا هەوڵ دەدەن کە مووشەکی شەهابی ٣ بۆ هەڵگرتنی کڵاوەی ناوکی ئامادە بکەن".
کارناسانی ئەمنییەتیی ئیسرائیل باسیان لەوە کردووە کە زانستی فەننیی بەرنامەی ناوکیی تاران بە قووڵی لەنێو زانکۆ و ناوەندە زانستییەکانی ئێراندا ڕۆ چووە و ئەوەش مەترسییەکی جیددییە بۆ سەر سەقامگیریی ناوچەکە.
بەرپرسانی سەربازی و ئەمنییەتیی ئیسرائیل هەڕەشەیان لەو زانا ناوکییانەی ڕێژیم کردووە و ڕایانگەیاندووە: "ئەوان لە ئیستاوە بە پیاوانی مردوو بە ئەژمار دێن".
