داخوازی ماشەڵڵا کەرەمی، باوگ مافخواز کومار (محەممەدمەهدی) کەرەمی، یەکێگ لە گیان‌بەختکریاگان جمشت «ژن، ژیان، ئازادی»، ئەرا دێیمین جار لە لاێ دەزگاێ قەزایی کومار ئێسلامییەو ڕەد کریاێەو.
شەهلا عورووجی، وەکیل ماشەڵلا کەرەمی، ئێعلام کردییە داخوازی تەجدیدنەزەر و ئازادی مەرجدار موکلەگەی بێ ئاگادار کردنەوەێ یاسایی، بێ نیشان داین هۊچ هۆکارێگ و تەنانەت بێ ئیجازەێ دین بڕیار دیوان باڵاێ ڕژیم، ڕەد بیە. یە لە حاڵێگە ک یەکەمین داخوازیش لە مانگ بەندان ١٤٠٢ لە لاێ دادگاێ تەجدیدنەزەر پارێزگاێ "ئەلبۆرز" ڕەد کریاۊد.
ماشەڵڵا کەرەمی لە دۊیای ئێعدام کوڕەگەی و شوون‌کەفتن مافخوازی، وەگەرد پەروەندەسازی فرەێگ و تۆمەتەیل قورسێگ لێوای « پۊلشوویی»، «گردبۊنەوە و هاندان خەڵک» و «تەبلیغات دژ وە ێیزام» ڕۊوەڕۊ بی.
ناوبریا وە بان یەک حوکم چەن ساڵ زندان، داین سزای نەختی یەک میلیارد و ٩٠٠ ملیۆن تمەنی و دەس‌وەسەرگرتن داراییەیلێ، جوور ماڵ و ماشینەگەی، دریاسە پێ.
ئاغاێ کەرەمی، ک لە مانگ خەزان ١٤٠٢ەو لە زندان ناوەندی کەرەج وە سەر بەێد، نیشانەێگ لە فشار سیستماتیک لە بان بنەماڵەیل مافخوازە ک تەنانەت لە سەرەتایی‌ترین مافەیل یاسایی خوەیانیش بێبەش کرین.
ڕەد کردن پشت‌سەر‌یەک داخوازەیلێ، تەقەلاێگ ئاشکراسە ئەرا بێدەنگ کردن دەنگ دادخوازی.
