ڕێکخراو بەخشین نێودەوڵەتی لە ڕاپۆرتێگ ئێعلام کردیە کە ڕژیم کومار ئێسلامی ئێران وە وێران کردن و دروست کردن پارکینگ لە بان قەتەێ ٤١ قەورسان "بەهەشت زەهرا"، لە تەمای سڕینەوەێ سیستماتیک بەڵگەێ تاوانەیل خوەێە. ئێ قەتە شوون خاکسپاریی ژمارەی فرەێگ لە دژبەرەیل سیاسی ئێعدام کریاێ دەیەی ٦٠ خوەری و گۆڕەیل وەکوومەڵە.
ئێ کارە لە درێژاێ دەیان ساڵ زەخت و فشار بێڕەحمانە دژ وە بنەماڵەێ قوربانیەیلە ک تەنانەت ڕێێ کاڵین گوڵ یا چاکردنەوەێ سەنگ قەورەیل ڕمیاێ ئەزیزەیلیانیش وەپیان نەدریایە. لە حاڵێگ ک یەکێگ لە بەرپرسەیل شارەداری تێران ئێ کارە وە ویانک هەوەجە وە پارکینگ پاساو داسەو، بەخشین نێودەوڵەتی جەخت کەێدەو ک ئێ گۆڕەیلە وەناو بەڵگەێ تاوان بایەد ئەرا لێکۆڵینەوەێ پزشک دادوەری پاریزراو بوو.
ئێ ڕێکخراوە وێران کردن ئێ قەورسانە وە تەقەلاێگ ئەرا شاردنەوەێ تاوانەیل وەیەردە و ڕێگری لە دەسرەسی بنەماڵەیل وە ڕاسی، دادپەروەری و ماف قەرەبوو زانێد و ئی کردەوە وە هۊرمانی تاڵ لە خوەی دەرکردن سیستماتیک دەسەڵاتدارەیل لە وەرانوەر تاوانەیل دژ وە ماف مرۆڤ لە سەرەتاێ شۆڕش ێیسلامییەو لە قەڵەم دێد.
