شەورای ڕێکخراوە مەدەنییەگان مەریوان وە دەرکردن بەیاننامەێگ، دەرکردن حوکمەیل قورس ئێنزباتی جور دەرکردن، خانەنشینی زوورەملێ و بڕێنەوە لە خزمەت ئەڕا ژمارەێگ لە ئامووژیارەیل چالاک لە کوردستان، وە توندی شەرمزار کرد.
ئی شەورا ئی کارەیلە وە ناو «ناڕەوا و سەرکوتگەرانە» زانست و داواکار هەڵوەشاننەوەی هەرچێ زۊتر گشت ئی حوکمەیلە بۊ.
لەی بەیاننامە وە ئاماژە وە دەور بنەمایی ئامووژیارەیل لە بارهاوردن نەوەی بانان و ئاشنا کردن قوتابیایل وەگەرد چەمکەیل ئازادی و دادپەروەری، هاتییە ک ئی حوکمەیلە نیشانەی لاوازی و بێ‌توانایی کاروەدەسەیلە لە چارەسەرکردن گیچەڵەگان ڕاسکانی وڵات.
شەورا جەخت لەسەر ئەوە کردیە ک لە دۆخێگ ک ئێران وەگەرد قەیرانەیل قۊڵ ئابووری و کوومەڵایەتی ڕۊوەوڕۊە، دەوڵەت لە جیای چارەسەری، هاز خوەی سەرف سەرکوت چالاکیەیل مەدەنی و سێنفی کردیە.
ئی بەیاننامە وە ناو ئامووژیارەیلێگ لێوای مەجید کەریمی، غیاس نێعمەتی، کاوە محەمەدزادە، سلێمان عەبدی و چەن کەسێگ تر ئاماژە کردیە و ئی حوکمەیلە وە نموونەی ئاشکرای «پەروەندەسازی و ئەمنیەتیکردن» چالاکیەیل فەرهەنگی و سێنفی ئامووژیارەیل زانستیە.
شەورای ڕێکخراوە مەدەنییەگان مەریوان، ک لە هەشت ڕێکخراو مەدەنی وەک ئەنجومەن سێنفی کارگەرەیل بیناسازی و ئەنجومەن سەوز چیا پێک هاتییە، وەگەرد نیشاندان پشتیوانی هەمەلایەنە لە ئامووژیارەیل کوردستان وە تایوەت ئەو ئامووژیارەیلە کە مافەگانیان پاماڵ کریاس، هۆشداری دایە ک کومەڵگای مەدەنی کوردستان بەرامبەر وە ئی باوەتە هەستیارە و تەنیا وەگەرد هەڵوەشاننەوەی تەمام حوکمەیل و هاوردنەوەی ئامووژیارەیل ئەڕا سەر کڵاسەیل دەرس، ئی گیچەڵە کووتایی وەپێ تیەد.
