سەرپەرستی زانکۆی زانستی پزیشکیی لوڕستان لە دانیشتنی ئەم دواییانەی خۆی لەگەڵ بەرپرسی گشتیی پشکنینی وەزارەتی بێهداشتی ڕێژیم جارێکی دیکە ڕایگەیاندووە کە بەشێکی بەرچاو لە ناوەندە بێهداشتییەکان و نەخۆشخانەکانی پارێزگاکە و کەلوپەلەکانیشی، کۆن بوون و ڕزیون.
بە وتەی جەلالەدین ئەمیری، بەشێکی بەرچاو لە ناوەندە بێهداشتییەکان و نەخۆشخانەکانی پارێزگاکە بە کەلوپەلەکانیشیانەوە ساڵانێکە ڕزیون و هیچ هەوڵێکی جیددی بۆ نۆژەنکردنەوەیان نەدراوە.
ئەمیری هەروەها خوازیاری پەلەکردن لە تەواوکردنی سێ پرۆژەی گەورەی نەخۆشخانە و جێبەجێکردنی یادداشتی لێکتێگەیشتنی ناوەندە دەرمانییەکان بوو.
گیرۆدەبوونی لوڕستان بە بوودجەی کەم لە دۆخی ئێستادا، چیدیکە وڵامدەری پێویستییەکانی خەڵکی بێبەریکراو نییە و درێژەی ئەم ڕەوتە هەڕەشە لە تەندروستیی خەڵک دەکات.
ئەم وتانە لەکاتێکدان کە لوڕستان لە ڕوانگەی پێنوێنەکانی گەشەی پزیشکییەوە هەمیشە لە پلەکانی خوارەوەی ئێراندا بووە و لە ساڵەکانی ڕابردوودا سەرەڕای جەختکردنەوەی زۆر لەسەر دادپەوەرەیی تەندورستی، سەرنجی پێویستی ئەم پارێزگایە نەدراوە.
