ژمارەیەک لە حیزب و چالاکانی سیاسیی کورد بە ئاماژە بە ڕۆڵی سەرەکیی سپای پاسدارانی کۆماری ئیسلامی لە سەرکوتی نێوخۆیی و تەشەنەسەندنی چالاکییە ناسەقامگیرکەرەکانی لە ناوچەکە، داوایان لە دەوڵەتی بریتانیا و باقی وڵاتانی ئورووپایی کرد کە ئەم ناوەندە بخەنە لیستی ڕێکخراوە تێرۆریستییەکانەوە.

ڕزگار ئالانی، نوێنەری حیزبی دێموکراتی کوردستانی ئێران لە بریتانیا، لە وتووێژێکدا لەگەڵ بڵاڤۆکی "Cap-Rep"، بە جەختکردنەوە لەسەر پێویستیی هەوڵی خێرای کۆمەڵگەی نێودەوڵەتی دژی سپای پاسداران، ڕایگەیاند: "سپای پاسداران لایەنێکی سەرکەش یان بەشێک لە دەسەڵات نییە، بەڵکوو باسکی سەرەکیی ڕێژیمێکە کە خەڵکەکەی خۆی سەرکوت دەکات، تێرۆر هەناردە دەکات و هەڕەشە لە ئاسایشی هاوپەیمانە ڕۆژاواییەکان دەکات."

ناوبراو بە ڕەخنەی توند لە سیاسەتی لەندەن لە بەرانبەر تاران، ڕایگەیاند: "خۆبواردنی بریتانیا لە جێبەجێکردنی بەڵێنە پێشووەکانی خۆی لەمەڕ قەدەغەکردنی چالاکییەکانی سپا، نیشانەی سازان و نەبوونی ئیرادەی سیاسییە؛ هەر ڕۆژێک کە هەوڵێک لەم بوارەدا نەدرێت، دەرفەتێکی زیاتر بۆ درێژەی چالاکییەکانی ماشینی تێرۆری تاران دەڕەخسێ."

بە وتەی ئالانی، خستنە نێو لیستی تێرۆری سپای پاسداران لەلایەن بریتانیاوە ئەو دەرفەتە دەخولقێنێ کە داراییەکانی ئەم ناوەندە لە خاکی بریتانیادا بلۆکە بکرێن و هەر چەشنە پشتیوانییەکی دارایی و چالاکیی داپۆشراوی ئەم ناوەندە نایاسایی ڕابگەیەندرێ و پۆلیس بتوانێ بە شێوەی لێبڕاوانەتر دژی تۆڕەکانی پێوەندیدار لە نێوخۆی وڵات کار بکات.

ناوبراو هەروەها جەختی کردەوە کە ئەم هەوڵە پەیامێکی ڕوون بە خەڵکی ئێران دەدات و ئەویش ئەوەیە کە "دەوڵەتە ڕۆژاواییەکان لەگەڵ ناڕازییاندان نەک لەگەڵ سەرکوتکەران."

ئالانی بە بڵاڤۆکی Cap-Repی وت: "چینی سیاسیی بریتانیا بە دۆکتورینی شکستخواردووی سازانەوە نووساوە؛ ئەوان باس لە پاراستنی کاناڵە دیپلۆماتیکەکان لەگەڵ ڕێژیمی ئێران دەکەن، بەڵام سپای پاسداران ساڵانێکە هۆشداریی شەڕی بە دیپلۆماسی داوە."

ئالانی ڕایگەیاند: ئەم ناوەندە تۆڕێکی گەورەی تاوانکاری و ئیتلاعاتی بەڕێوە دەبات و بەرپرسی تێرۆرەکان، ڕفاندنەکانی مرۆڤ و هەڕەشەکان دژی هاووڵاتییانی بریتانیاییە و نەخستنی ئەم ڕێکخراوە لە لیستی تێرۆری بریتانیا، وریایی نییە بەڵکوو ترسنۆکییە."

لە بەشێکی دیکەی ئەم ڕاپۆرتەدا، شیوا مەحبووبی، وتەبێژی "کەمپەینی ئازادیی بەندکراوانی سیاسی لە ئێران" کە دانیشتووی لەندەنە، بە ڕەخنەگرتن لە سیاسەتی ناسراو بە "سازان" ڕایگەیاند: "ڕێژیمی ئێران پێکهاتەیەکی مافیایی هەیە و تەنیا زمانی هەڕەشە، بارمتەگیری و لەسێدارەدان دەزانێ، وتووێژ و هەوڵدان بۆ پاراساتنی کاناڵە دیپلۆماتیکەکان لەگەڵ ئەم جۆرە حکوومەتە ئاکامێکی نییە."

ناوبراو وتیشی: "زۆرینەی خەڵکانی ئێران پێشوازی لە لاوازکردن و سڕینەوەی ئەو بەرپرسانە دەکەن کە ڕۆڵیان لە سەرکوت و کوشتندا هەبووە. کۆمەڵگەی جیهانی دەبێ لەم ڕاستییە تێ بگات و لە ڕێگەی گوشاری دیپلۆماتیک و ئابوورییەوە، لەوانە بلۆکەکردنی داراییەکانی ڕێژیم و داخستنی باڵوێزخانەکان، تێچوویەکی زیاتر بەسەر تاراندا بسەپێنێت."