ڕۆژی دووشەممە ٣ی خەرمانانی ١٤٠٤ی هەتاوی، ڕێوڕەسمێک بە بەشداریی مامۆستایان مەسعوود یارە، مامۆستا ڕێبین حەیدەری و مامۆستا موحسین ڕەزەوی و ئەندامانی بەڕێوەبەرایەتیی ناوەندی فەرهەنگی و فێرکاریی بەیان لە پێشانگای کاک ڕێبین حەیدەری بەڕێوە چوو.
لە سەرەتای ڕێوڕەسمەکەدا ناسر ناسری ئەندامی بەڕێوبەرایەتیی فێرگەی زمانی کوردیی بەیان، باسێکی تێروتەسەلی سەبارەت بە هۆکارەکانی مردنی زمان و ئاسمێلاسیۆن و ڕێکارەکانی پاراستنی زمانی کوردی کرد و دواتر مامۆستا ڕێبین حەیدەری و مامۆستا مەسعوود یارە هەرکامیان لەسەر گرینگیی زمان جەختیان کردەوە و ئەو هەنگاوە گرینگەی چالاکانی فەرهەنگی و مەدەنییان بەرز نرخاند.
دواتر مامۆستا مەسعوود یارە و کاک ئەفشین شەریفیان بە دەنگە بەسۆزەکەیان کۆڕەکەیان ڕازاوەتر کرد، لە کۆتایی ئەم ڕێوڕەسمەدا، وێڕای پێشکەشکردنی بڕوانامە بە دەرچووانی ئەو خولە، ڕێزی تایبەتیان لێ گیرا.
جێی ئاماژەیە ناوەندی فەرهەنگی و فێرکاریی بەیان، ساڵی ١٣۹۶، بە مەبەستی خزمەتی خۆبەخشانه بە زمان و وێژەی کوردی، لە شاری بۆکان دامەزرا و لە ماوەیەکی کەمدا توانیی بە چالاکییە بەردەوامەکانی لە زۆربەی شارەکانی ڕۆژھەڵاتی کوردستان جێی خۆی بکاتەوە و خزمەتێکی بەرچاو و گرینگ بە زمانی کوردی بکا، بەجورێک کە ساڵانه بە سەدان کەس لە شار و گوندەکانی ڕۆژهەڵات فێری خوێندن و نووسین بە زمانی کوردی دەبن.
