هەواڵدەریی ئاسۆشەیتێدپرێس لە دووتوێی ڕاپۆرتێکدا باسی لەوە کردووە کە ڕۆدۆلف حیکل فەرماندەی ئەرتەشی ئەو وڵاتە ڕایگەیاندووە: "پێسێردراوێکی هەستیار" بۆ ڕادەستکردنی چەک بە ئەرتەش و چەکدانانی حیزبوڵڵا هەتا کۆتایی ساڵی زایینی و بە پشتیوانیی ئەمریکا بەڕێوە دەچێت.
ڕۆژی هەینی ٨ی خەرمانان، لە بیاننامەیەکدا ژێنێراڵ حیکل فەرماندەی ئەرتەشی لوبنان جەختی لەوە کردووە کە ئەرتەش هەموو هەوڵە پێویستەکان بۆ سەرکەوتنی ئەو پێسپێردراوە دەخاتە گەڕ.
هەروەها حیکل لە کۆبوونەوەیەک لەگەڵ فەرماندەکانی ئەرتەشی لوبنان باسی لەوە کرد: "ئەرتەش لە بەرەبەری قۆناغێکی هەستیاردایە کە پێسپێردراوی گرنگ و شوێندانەری تێیدا بەڕێوە دەچێت".
دەوڵەتی لوبنان لە سەرەتای مانگی ئووتدا داوای لە ئەرتەشی ئەو وڵاتە کرد هەتا کۆتایی ئەو مانگە گەڵاڵەیەک بۆ چەکدانانی حیزبوڵڵا، هەموو چەکەکانی ئۆردووگای فەلەستینییەکان، دابین بکات.
هەروەها نووسینگەی سەرۆکوەزیرانی لوبنان لەو بارەوە ڕایگەیاند: "شاندی دەوڵەت لە ڕۆژی ٥ی سێپتامبرەوە بۆ هەڵسەنگاندنی ئەو گەڵاڵەیە کۆ دەبنەوە".
ئەو لێدوانەی بەرپرسانی سیاسی و فەرماندە سەربازییەکانی لوبنان لەکاتێکدایە کە ڕێبەرانی حیزبصڵڵا بە توندی دژایەتیی خۆیان بەنیسبەت گەڵاڵەی چەکدانانیشد ڕەت کردووەتەوە و ئەو هەوڵەی وەکوو پیلانی ئیسرائیل لە قەڵەم داوە و ڕایگەیاندووە: "بڕیاری دەوڵەت لەبارەی چەککردنی حیزبوڵڵا تەنیا لە بەرژەوەندیی ئیسرائیلدایە".
هەروەها نەعیم قاسم سکرتێری گشتیی حیزبۆڵڵا لەو بارەوە هۆشداری دا و هەڕەشەی پەرەپێدان و بەربڵاوکردنی شەڕی نێوخۆیی لەو وڵاتە کرد و بەرپرسیارەتیی وەها شەڕێکی خستووەتە ئەستۆی دەوڵەتی لوبنان.
ئاگربەستی نێوان حیزبوڵڵا و ئیسرائیل بە نێونجی ئەمریکا لە نۆڤامبری ٢٠٢٤ ڕاگەیەندرا هەتا ڕێگری لە شەڕی ڕاستەوخۆ بکات، سەرەڕای ئاگربەست حیزبوڵڵا ڕایگەیاند کە هەتا ئیسرائیل لە ٥ ناوچەی کێشەلەسەر لە خاکی لوبنان پاشەکشێ نەکات و هێرشە ئاسمانییەکانی ڕانەگرێت، ئامادە نییە چەک دابنێت.
هەر لەو پێوەندییەدا ئەرتەشی ئیسرائیل ڕۆژی هەینی ڕایگەیاند کە یەكێک لە هێزە بژاردەکانی "ڕزوان" سەر بە حیزبوڵڵا لە باشووری لوبنانی کردووەتە ئامانج و کوشتوویەتی.
ئاسۆشەیتێدپرێس لەو ڕاپۆرتەدا پەرژاوەتە سەر ئەوەی کە ژێنێڕاڵ حیکل لە پێوەندییەکی تلفۆنیدا لەگەڵ بەرپرسانی سووریە لەبارەی بەهێزترکردنی کۆنتڕۆڵی سنوورە هاوبەشەکانیان کە حیزبوڵڵا لەو ڕێگەیەوە ئەو چەکوچۆڵانەی کە لەلایەن ڕێژیمی ئێرانەوە ڕەوانە دەکرا، قسەی کردووە.
