شۆرای ئەمنییەتی ڕێکخراوی نەتەوە یەکگرتووەکان ڕۆژی هەینی ٧ی خەرمانان، لەسەر داواکاریی سێ وڵاتی بریتانیا، فەرانسە و ئاڵمان بۆ گەڕانەوەی سزاکان بۆ سەر ئێران، کۆبوونەوەیەکی بەڕێوە برد.
لەم دانیشتنەدا سێ وڵاتی ئورووپایی ناسراو بە ترۆئیکا، داوایان لە تاران کرد کە سێ مەرجی ئەوان جێبەجێ بکات تاکوو هەڕەشەی گەڕانەوەی گەمارۆکانی ڕێکخراوی نەتەوە یەکگرتووەکان وەدوا بخرێت و کەشێکی پێویست بۆ دانوستان بێتە ئاراوە.
ئەم سێ وڵاتە دەسپێڕاگەیشتنی چاوەدێرانی ئاژانسی نێونەتەوەیی وزەی ناوکی، چارەسەرکردنی نیگەرانییەکان سەبارەت بە ئورانیۆمی پیتێندراو و گەڕانەوە بۆ سەر مێزی وتووێژەکان لەگەڵ ئەمریکای وەک سێ مەرج بۆ کۆماری ئیسلامی لە ئێستادا دیاری کردووە.
باربارا وودوارد، نوێنەری بریتانیا لە شۆرای ئەمنییەت، لەم دانیشتنەدا ڕایگەیاندووە کە ترۆئیکای ئورووپایی هیچ چارەیەکی دیکەیان جگە لە چالاککردنی مێکانیزمی ماشە نەبووە و جەختیشی کردووەتەوە کە هێشتا ڕێگەکان بۆ گەیشتن بە ڕێککەوتن دانەخراوە.
بەرپرسانی کۆماری ئیسلامی ڕایانگەیاندووە کە ئەم هەوڵانەی سێ وڵاتی ئورووپایی هیچ بنەمایەکی یاسایی نییە.
تاران پێشمەرجەکانی بریتانیا، فەرانسە و ئاڵمان بە بابەتێکی دوور لە ڕاستی دەزانێت و ڕایگەیاندووە کە تەنیا لە کەشێکی دادپەروەرانە و بێلایەنانە ئامادەیە درێژە بە وتووێژەکان بدات.
هەر لە ڕۆژی هەینیدا و هاوکات لەگەڵ داخوازیی ئەم سێ وڵاتە بۆ گەڕانەوەی هەموو گەمارۆکانی نەتەوە یەکگرتووەکان بۆ سەر تاران، وەزارەتەکانی دەرەوەی ڕووسیە و چین ئەم هەوڵەیان مەحکووم کرد.
وەزارەتی دەرەوی ڕووسیە بە دەرکردنی بەیاننامەیەک سەبارەت بە کاراکردنی مێکانیزمی ماشە هۆشداریی دا و ڕایگەیاند کە ئەگەری هەیە ئەم هەوڵە لێکەوتەگەلێکی قەرەبوونەکراوی بەدواوە بێت و جەختیشی کردەوە کە داوا لە ئورووپا دەکەن کە پێداچوونەوە بە سەر بڕیاری هەڵەی خۆیاندا بکەن.
هاوکات وتەبێژی وەزارەتی دەروەی چین لە کۆبوونەوەیەکی ڕۆژنامەوانیدا لە پێکەن، ڕایگەیاندووە کە دۆسییەی ناوکیی ئێران لە ئێستادا لە قۆناغێکی هەستیاردایە و کاراکردنی مێکانیزمی ماشە بە هەوڵێکی گونجاو نازانێت و جەختیشی کردووەتەوە کە ئەم هەوڵە پرۆسەی چارەسەرکردنی دۆسییەکە لە ڕێگەی وتووێژەوە بە تواوەتی لاواز دەکات.
