لیندسی گراهام سیناتۆری کۆماریخوازی ئەمریکا لە وتارێکدا لە تێلاڤیڤ هۆشداری دا کە سەرەڕای وێرانبوونی دامەزراوە ئەتۆمییەکانی کۆماری ئیسلامی لە هێرشەکانی ئەمریکا، خواستی ئایەتوڵڵاکان بۆ دروستکردنی چەکی ئەتۆمی لەنێو نەچووە و تواناکانی ڕێژیمی ئێرانیش پێویستی بەوەیە کە لە نزیکەوە چاودێریی کردەوەکانی تاران بکرێت.
گراهام وتی کە بەرنامەی کۆماری ئیسلامی نە تەنیا دژی ئیسرائیل هەڕەشەیە، بەڵکوو هەڕەشەیەکی گەورە بۆ سەر ئەمریکا و هاوپەیمانەکانی.
ناوبراو بڕیاری دۆناڵد ترامپ لە بابەت هێرش بۆسەر دامەزراوە ناوکییەکانی ئێرانی بوێرانە ناو برد و وتی عەمەلیاتی ئەمریکا بە سەرکەوتوویی دامەزراوە ناوکییەکانی کۆماری ئیسلامیی لەنێو برد.
ئەو سیناتۆرە کۆمارییخوازە ئاماژەی بەوە دا کە هێرشی ئەمریکا بۆ سەر دامەزراوە ناوکییەکانی ئێران، توانا و نفووزی ناوچەیی کۆماری ئیسلامیی گەیاندووەتە نزمترین ئاستی خۆی.
ناوبراو جەختی کردەوە کە ئەمریکا ئێستا دەبێت زۆر بە جیددی بۆ گەیشتن بە ڕێککەوتن سەبارەت بە نفووزی ناوچەیی کۆماری ئیسلامی هەنگاو بنێت.
گراهام لە سێ وڵاتی ئورووپایی ئەندام لە بەرجام بۆ چالاککردنی مێکانیزمی ماشە دژی کۆماری ئیسلامی پیرۆزبایی کرد و ئەم کارەی بە پێویست زانی.
