ڕێکخراوی نەتەوە یەکگرووەکان سەرەڕای ئاماژەدان بە لەسێدارەدانی ٨٤١ بەندکراو لەلایەن کۆماری ئیسلامییەوە، نیگەرانیی خۆی لەمەڕ "کەڵوەرگرتن لە سێدارە وەکوو کەرەستەی سەرکوت و بڵاوکردنەوەی ترس و دڵەڕاوکێ" دەربڕی.
ڕۆژی هەینی ٧ی خەرمانان، نووسینگەی مافی مرۆڤی ڕێکخراوی نەتەوە یەکگرتووکان ڕایگەیاند: "لە نیوەی یەکەمی ساڵی ٢٠٢٥ی زایینی ڕێژەی لەسێدارەنەکان لە ئێراندا هەڵکشانی بەرچاوی بەخۆوە بینیوە".
لە کۆبوونەوەیەکی ڕۆژنامەوانیدا "ڕاڤینا شەمداسانی" وتەبێژی ئەو نووسینگەیە بە ڕۆژنامەوانانی وت: "بەرپرسانی ئێرانی لانیکەم ٨٤١ کەسیان لە سەرەتای ساڵەوە هەتا ٢٨ی ئووتی ئەمساڵ لە سێدارە داوە".
هەروەها "شەمداسانی" لەو کۆبوونەوە ڕۆژنامەوانییەدا وتی: "بە سەرنجدان بە نەبوونی ئامارێکی فەرمی و ڕوون و شاردەنەوەی وەها ئامارێک لەلایەن بەرپرسانی ڕێژیمەوە، ئاماری ڕاستەقینە زۆر جیاوازتر و کارەساتبارترە".
ناوبراو ئاماژەی بەوە دا کە تەنیا لە مانگی ژووئییە لە ئێراندا لانیکەم ١١٠ کەس لە سێدارە دراون ئەوەش دوو قات زیاتر لە ڕێژەی لەسێدارەدراوانی هەمان مانگ لە ساڵی ڕابردوودایە.
هەر لەو پێوەندییەدا ڕێکخراوی نەتەوە یەکگرتووەکان لەسێدارەدانی پێش چاوی خەڵکی مەحکووم کرد و وتی: "نووسینگەی مافی مرۆڤ هەتا ئێستا ٧ حاڵەتی لەسێدارەدانی لەو چەشنەی لە سەرەتای ساڵەوە لەلایەن کۆماری ئیسلامییەوە تۆمار کردووە".
نووسینگەی مافی مرۆڤی ڕێکخراوی نەتەوە یەکگرتووەکان هەروەها جەختی لەوە کردەوە: "لەسێدارەدانی پێش چاوی خەڵک، بێڕێزی و سووکایەتیی دوو قاتە بە کەرامەتی مرۆڤ و نەک هەر کەرامەتی کەسی لەسێدارەدراو بەڵکوو بۆ هەموو ئەو کەسانەی کە ئەو جینایەتە دەبینن و سەیری دەکەن".
هەروەها "شەمداسانی" ڕایگەیاند نووسینگەی مافی مرۆڤی ڕێکخراوی نەتەوە یەکگرتووەکان بۆ جارێکی دیکە داوا لە ڕێژیمی کۆماری ئیسلامی دەکات کە چیتر لە جێبەجێکردنی سزای لەسێدارەدان خۆی ببوێرێت.
بەپێی زانیارییەکان لە ئێستادا ١١ کەسی دیکە مەترسیی "لەسێدارەدانی نزیک لە جێبەجێکران"ـیان لەسەرە.
