ڕێژەیەکی بەرچاو لە خەڵکی کوردستان و چالاکانی سێنفی، ژینگەیی و فەرهەنگی لە کۆبوونەوەیەکی بەربڵاو لە ئاویەری سنە بەنیسبەت دەرکرانی مامۆستایانی قوتابخانەی کوردستان و سەپاندنی سزای قورس بە سەریاندا، کۆبوونەوەی ناڕەزایەتییان بەڕێوە برد و خوازیاری هەڵوەشانەوەی ئەو سزا نادادپەروەرانەی دژی مامۆستایان بوون.
ڕۆژی هەینی ٧ی خەرمانان، "کۆمیتەی خەڵکیی پشتیوانی لە مامۆستایانی دەرکراوی کوردستان" لە کۆبوونەوەیەکی سەدان کەسیدا و بە بەشداریی خەڵکی کوردستان لە ڕێپێوانێکدا بەرەو شاخی ئاویەر، بە هەڵگرتنی دروشمی "مامۆستای بەندکراو دەبێت ئازاد بکرێت"، "کرێکار، مامۆستای قوتابخانە، خوێندکار، یەکگرن، یەکگرن" و "مامۆستای ئازادە، پشتیوانیت لێ دەکەین" خوازیاری هەڵوەشانەوەی ئەو سزایانە دژی مامۆستایان و گەڕانەوەیان بۆ پۆلی وانەوتنەوە بوون.
شایانی باسە دەرکردنی مامۆستایانی قوبابخانەکانی کوردستان و سەپاندنی سزای قورس بە سەریان لەلایەن ناوەندە پێوەندیدارەکانی ڕێژیمەوە، وزیری پەروەردە و بارهێنانی ڕێژیم باسی لە کەمیی لانیکەم ١٣٠ هەتا ١٤٠ هەزار مامۆستای قوتابخانە کردووە.
هەروەها ڕۆژی پێنجشەممە ٦ی خەرمانان لە سەقز دەستەیەک لە مامۆستایانی خانەنشین و چالاکی مەدەنی بۆ نیشاندانی ناڕەزایەتی لە بارودۆخی پەروەردە و زەخت لەسەر هاوکارانیان و دەرکردنیان لەسەرکار، لە ڕێپێوانێکدا بۆ لووتکەی بێساڵوو، بڕیاری دەرکردن و هەڵاواردنی چەند کەس لە مامۆستایانی شارەکانی کوردستانیان بە توندی ئیدانە کرد.
پێشتر ئەنجومەنی سێنفیی مامۆستایانی کوردستان بە بڵاوکردنەوەی بەیاننامەیەک، باسی لە دەرکردنی ١٤ مامۆستای قوتابخانە لە شارەکانی سنە، دیواندەرە و سەقز کردبوو.
بەپێی ئەو بەیاننامەیە، چوار مامۆستای قوتابخانەی دیواندەرە بە ناوەکانی "پەرویز ئەحسەنی"، "کاوە محەممەدزادە"، "هیوا قوڕەیشی" و "ئومید شامحەممەدی" کە ئەندامی "ئەنجومەنی سێنفیی مامۆستایانی کوردستان" بوون، بەهۆی چالاکیی سێنفی و پێداگری لەسەر مافی مامۆستایان و قوتابییان، لە ئەرکی مامۆستایەتی دوور خراونەتەوە.
هەروەها لە شاری سەقز، سێ مامۆستای قوتابخانە و ئەندامانی ئەو ئەنجومەنە بە ناوەکانی "شارام کەریمی" بە شەش مانگ دەرکردن لە قوتابخانە، "لوقمان ئەڵڵامورادی" بە یەک ساڵ دەرکردن و "سولەیمان عەبدی" بە خانەنشینیی زۆرەملێ سزا دراون.
ئەو ئەنجومەنە لە بەیاننامەی خۆیدا جەختی کردەوە کە لە ماوەی ڕۆژانی ڕابردوودا ٧ مامۆستای قوتابخانە و چالاکی سێنفیی مامۆستایان لە سنە بە ناوەکانی مەجید کەریمی، غیاس نێعمەتی، سەلاح حاجی‌میرزایی، نەسرین کەریمی، لەیلا زارعی، فەیسەڵ نووری و سومەیە ئەختەرشومار حوکمی هاوشێوەیان بەسەردا سەپێندراوە.
