مامۆستا لوقمان ئەمینی، پێشنوێژی مزگەوتی "چوار یاری نەبی"ی سنە لەلایەن دادسەرای تایبەتی ڕوحانییەتی تارانەوە سزای سێ ساڵ و یەک مانگ بەندکران و وەرگرتنەوەی هەتاهەتایی جلوبەرگی ئایینی بەسەردا سەپێندرا.
بەپێی ڕاپۆرتی ''کوردپا'' مامۆستا لوقمان ئەمینی، کەسایەتیی ئایینی و پێشنوێژی مزگەوتی "چوار یاری نەبی"ی سنە بە تۆمەتی "سووکایەتی بە پیرۆزییەکان" لەلایەن دادسەرای تایبەتی ڕوحانییەتی تاران سزای سێ ساڵ و یەک مانگ بەندکران و لێ وەرگرتنەوەی هەتاهەتایی جلوبەرگی ئایینیی بەسەردا سەپێندرا.
بە وتەی سەرچاوەیەکی ئاگادار، ئەو حوکمە لە ماوەی ڕۆژانی ڕابردوودا بە مامۆستا لوقمان ڕاگەیەندراوە.
ڕۆژی دووشەممە ١٢ی جۆزەردانی ١٤٠٤، مامۆستا لوقمان بە دانانی بارمتە لە زیندانی هەمەدان ئازاد کرا.
ڕێکەوتی ١ی بانەمەڕی ١٤٠٤، ئەو مامۆستا ئایینییە پاش ئامادەبوونی لە دادگای تایبەتی ڕوحانییەتی هەمەدان بە تۆمەتی "سووکایەتیکردن بە پیرۆزییەکان" دەسبەسەر کرا و بە دەرکردنی حوکمی دەسبەسەرکردنی کاتی بۆ زیندانی هەمەدان گواسترایەوە.
مامۆستا لوقمان جۆزەردانی ١٤٠٢، لەلایەن دادگای تایبەت بە مامۆستایانی هەمەدان بە تۆمەتی "ڕاگرتنی چەکی کەمەری"، "پڕوپاگەندە دژ بە ڕێژیم و بە قازانجی حیزبە کوردستانییەکان" و "هاندانی خەڵک بۆ ئاژاوە و پاڵپشتی لە ناڕازییان لە بزووتنەوەی ژن، ژیان، ئازادی" سەرجەم سزای ۱۱ ساڵ بەندکرانی بەسەردا سەپێندرابوو.
مامۆستا لوقمان ئەمینی ڕێکەوتی ۱۰ی ڕێبەندانی ١٤٠١، لە ڕێگای سنە ـ مەریوان لەلایەن هێزەکانی ئیتلاعاتەوە دەسبەسەر کرا و ڕێکەوتی ۳ی ڕەشەممەی هەمان ساڵ بە دانانی بارمتە و بەشێوەی کاتی هەتا کاتی کۆتاییهاتنی پرۆسەی دادگاییکردنەکەی ئازاد کرا.
