وەزیری دەرەوەی وڵاتی فەرانسە ڕایگەیاندووە کە سەرەڕای دەسپێکی پرۆسەی مێکانیزمی ماشە، هێشتا تاران دەرفەتی ئەوەی هەیە کە لە ڕێگەی دیپلۆماسییەوە کێشەکان چارەسەر بکات.
ژان نوئێل بارۆ لە پەراوێزی دانیشتنی وەزیرانی دەروەی یەکیەتیی ئورووپا لە کۆپێنهاگی دانمارک، وتی: "تاران دەیتوانی لەپێناو هاوکاریکردن لەگەڵ ئاژانسی نێونەتەوەیی وزەی ناوکی پێش بە گەڕانەوەی سزاکان بگرێت، بەڵام هیچ وڵامێکی نەدایەوە".
بارۆ پشتڕاستی کردووەتەوە کە پاش مۆڵەتێکی سی ڕۆژەی دیکە، هەموو سزاکانی پێشوو دەگەڕێندرێتەوە بۆ سەر تاران و جەختیشی کردووەتەوە کە لەم ماوەیەدا ڕێگەی دیپلۆماسی داناخرێت.
هاوکات لەگەڵ دەسپێکی پڕۆسەی چالاککردنی مێکانیزمی ماشە و گەڕانەوەی گەمارۆ نێونەتەوەییەکان بۆ سەر ئێران لە ڕۆژانی ڕابردوودا، کۆماری ئیسلامی لەهەمبەر ئەم هەوڵانەی ئورووپا هەڵوێستی گرتووە و ڕایگەیاندووە کە داواکارییەکانی سێ وڵاتی بریتانیا، فەرانسە و ئاڵمان، دوور لە ڕاستییەکانە و تەنیا بەپێی شوێنکەوتوویی ئورووپا لە ئەمریکایە.
سێ وڵاتی ئورووپایی ئەندام لە ڕێککەوتنی بەرجام و ناسراو بە ترۆئیکا، پرۆسەی چالاککردنی مێکانیزمی ماشە واتا گەڕانەوەی هەموو گەمارۆ نێونەتەوەییەکان و ٦ بڕیارنامەی شۆرای ئەمنییەتی نەتەوە یەکگرتووەکانیان بۆ سەر ئێران دەست پێ کرد.
لە ڕێککەوتنی بەرجامدا ئەم مافە بە هەر یەک لە لایەنەکان دراوە کە ئەگەر هەستیان بەوە کرد کە لایەنی بەرامبەر پێبەندییەکانی خۆی ڕەچاو ناکات، داوای چالاککردنی ئەم ڕێوشوێنە بکات.
جێی ئاماژەیە کە هیچ یەک لە لایەنەکان مافی ڤێتۆکردنی ئەم داواکارییەیان بۆ لە بەرچاو نەگیراوە و تەنانەت دوو وڵاتی چین و ڕووسیە ناتوانن لەم پێوەندییەدا یارمەتیی کۆماری ئیسلامی بدەن.
بەپێی زانیارییەکان، ئەم پرۆسەیە بریتی دەبێت لە گەڕانەوەی هەموو بڕیارنامەکانی شۆرای ئەمنییەت لە ساڵی ٢٠٠٦ تاکوو ساڵی ٢٠١٥ی زایینی بە دژی ئێران کە سزاکان بۆ سەر بانکی ناوەندی، تێکنۆلۆژیی ناوکی، چەکوچۆڵ، گواستنەوەی بار و پشکنینی کەشتییەکانی ئێرانی بە دواوە دەبێت.
