کەمیی ١٠٠ هەزار پەرەستار لە کەرتی تەندروستیی ئێران گیانی نەخۆشەکانی خستووەتە مەترسییەوە.
عەباس عێبادی جێگری پەرستاریی وەزارەتی تەندروستیی ڕێژیم بە ئاماژەدان بە هەڵهاتنی ٥٧٠ پەرستار لە ساڵی ١٤٠٤دا ڕایگەیاند: "لە ئێراندا کێشەی کەمیی ١٠٠ هەزار پەرستارمان هەیە و ئەو کێشەیە زیانێکی زۆری ئابووری و کۆمەڵایەتیی بەدواوەیە".
ڕۆژی هەینی ٧ی خەرمانان، ڕەزا سەیدکەرەمی، سەرۆکی زانکۆی پزیشکیی تاران بە ئاماژەدان بە قەیرانی کەمیی پەرەستار لە تاراندا وتی: "بەهۆی زۆری تێچووی ژیان لە تاران، پەرەستاران نایانەوێت لە نەخۆشخانە دەوڵەتییەکاندا کار بکەن و پێیان باشە یان لە شارەکانی دیکەدا ئەرکی خۆیان ڕاپەڕێنن یان پیشەی ناپێوەندیدار هەڵبژێرن".
هەروەها پێشتریش محەممەدتەقی جەهانپوور سەرۆکی ڕێکخراوی نیزام پەرەستاریی ئێران، بە هەواڵنێری "مهر"ـی سەر بە ڕێژیمی ئێرانی ڕاگەیاندبوو کە لە ماوەی ٩ مانگی سەرەتای ساڵی ڕابردوودا، ٢١٦ پەرستار بە هۆی قورسبوونی کارەکانیان و کەمبوونی ڕێژەی مووچەکانیان ناچار بوون کە دەست لە کارەکەیان بکێشنەوە.
بەپێی ستاندارد هەر پەرستارێک ١٥٠ کاتژمێر ئەرکی هەیە و کارکردنی زیاتر لەم ڕێژەیە بە خواستی خۆیانە، بەڵام لە ئێستادا بە هۆی کەمیی پەرستار لە نەخۆشخانەکانی ئێران ماوەی زۆری کار بۆ پەرستاران بووەتە ئەرک و بە هۆی کەمبوونی پەرستار لە ئێستادا گوشارێکی زۆر کەوتووەتە سەر پەرستارەکانی دیکە و ئەوان ناچارن کە ٢٠٠ کاتژمێر کاری زیاتر بکەن.
هەروەها سەرۆکی زانکۆی زانستی پزیشکیی ئێران لە ماوەی ڕابردوودا لەو بارەوە هۆشداریی دابوو و وتبووی: "ئەمساڵ کەمیی پەرستار لە نەخۆشخانەکان بووەتە هۆی زیادبوونی ڕێژەی گیانلەدەستدانی نەخۆشەکان، و ساڵانە زیاتر لە ٣ هەزار پەرستار کۆچ بۆ دەرەوەی ئێران دەکەن، بەڵام وەزارەتی تەندروستیی ئێران نیوەی ئەو ڕێژەیەش بە کادری دەرمانی زیاد ناکات و لە ئێستادا نەخۆشخانەکانی ئێران لەگەڵ کەمیی زیاتر لە ١٠٠ هەزار پەرستار بەرەوڕوون".
