بەرزبوونەوەی شەهرییە لە زانکۆی ئازاد جارێکی دیکە نیشانی دەدات کە سیاسەتەکانی کۆماری ئیسلامی لە بواری خوێندنی باڵادا لەسەر بنەمای "بازرگانی" دامەزراوە نەک "دادپەروەری".
ڕاپۆرتەکان ئاماژە بەوە دەکەن کە شەهرییەی جێگیر بۆ هەندێک بواری خوێندن لە ٢ میلیۆنەوە بۆ ١٢ میلیۆن تمەن زیادی کردووە و لە زانستە پزیشکییەکانیشدا تەنانەت لەسەدا ٢٠٠ زیادی کردووە.
هاوکات لەگەڵ ئەوەی کە بەرپرسانی زانکۆ ئەم ژمارانە ڕەت دەکەنەوە، وەزیری زانست لە مانگی سەرماوەزی ١٤٠٣ بەرزکردنەوەی سێ قاتی شەهرییەی زانکۆی پشتڕاست کردەوە و ئەمەی بە "شۆکێک بۆ بنەماڵەکان" وەسف کرد.
ئەو دۆخە تەنیا نموونەیەک لە سیاسەتە ئابووری و پەروەردەییەکانی ڕێژیمە کە دەستڕاگەیشتن بە خوێندنی لاوانیان کردووە بە کاڵایەکی گرانبەها.
لاکاتێکدا کە خوێندکاران دەبێ هیوای داهاتوو بن، ئەمڕۆ لە نێوان قەرز و گوشاری ئابووری و مەترسی وازهێنان لە خوێندندا گیریان خواردووە.
بەرپرسانی زانکۆی ئازاد ئیدیعای ئەوە دەکەن کە بەرزبوونەوەی شەهرییە "لەسەر بنەمای دادپەروەرییە" بەڵام ئەم بەرزبوونەوەیە زیاتر دەرخەری ئەوەیە کە سیستمی حوکمڕانی بچووکترین بەها بۆ مافی خوێندنی یەکسان و داهاتووی نەوەی گەنج دانانێت.
