ناوەندی بیرکردنەوەی هونەریی "جەکسۆن"، لە ڕاپۆرتێکدا پەرژاوەتە سەر دۆخی ئێران لە هەنووکەدا کە پاش شکستە قورسەکانی کۆماری ئیسلامی ئەم ڕێژیمەی بردووەتە لێواری هەڵدێر و ئەگەرەکانی دەسپێکی شەڕێ ناوخۆیی زیاد کردووە.
ئەم ناوەندە ئەمریکایی بریتانیاییە لە ڕاپۆرتەکەیدا باسی لەوە کردووە کە کۆماری ئیسلامی، پاش شکستە قورسەکانی خۆی و باڵەکانی لە ناوچەکەدا لە بەرامبەر ئیسرائیل، گەیشتووەتە لێواری هەڵدێری ڕووخان و لە ئیستادا هەر بۆشاییەکی هێز و دەسەڵات دەتوانێت ئێران بەرەو شەڕی ناوخۆ ببات و ناوچەکە بەرەو ناسەقامگیرییەکی بەربڵاو ئاراستە بکات.
ناوەندی بیرکردنەوەی جەکسۆن لە درێژەدا جەخت لەسەر ئەوە دەکاتەوە کە دەبێت بە هەر تێچوویەک بێت ڕێگە نەدرێت کە ئێران لە شەڕێکی ناوخۆیی تێوە بگلێت و تێپەڕینی سیاسی لەم دۆخەدا تەنیا لەکاتێکدا سەرکەوتوو دەبێت کە بەپەلە و بە تێچوویەکی کەم ئەنجام بدرێت.
ئەم ناوەندە بەهێزکردنی ئۆپۆزیسیۆن و پشتیوانیی ئابووری لە ئێران پاش ڕووخانی کۆماری ئیسلامی، بە باشترین ڕێگە بۆ ئەم مەبەستە دەزانێت.
ڕاپۆرتەکە لە بەشێکی دیکەدا و بە ئاماژەدان بە ڕووخانی ڕێژیمی بەشار ئەسەد لە سووریە و زەبری قورس بە "قووڵایی ستراتێژیک"ـی کۆماری ئیسلامی لە ناوچەکەدا بەمەبەستی گەمارۆدانی ئیسرائیل لە ڕیگەی میلیشیاکانەوە، باسی لەوە کردووە کە: "سەرەڕای هەموو ئەمانە تاران دەست لە هەوڵەکانی خۆی هەڵناگرێت و چالاکییە تێرۆریستی و بەرنامە ئەتۆمی و مووشەکییەکانی خۆی وەگەڕ دەخاتەوە".
ئەم ناوەندە هۆشداریی داوە کە دەستێوەردان و هێرشی دەرەکی دەتوانێت کە پەرە بە خۆڕاگریی نەتەوەیی بدات و خەڵک بوردومانکردنی شارەکانیان وەک دەستدرێژییەکی نایاسایی چاو لێ بکەن.
ناوەندی بیرکردنەوەی جەکسۆن لە کۆتایی ڕاپۆرتەکەیدا بۆ تێپەڕبوون لە وەها سیناریۆیەک و باشترین ڕێگەچارە، پێشنیار دەکات کە ڕۆژاوا یارمەتیی ئۆپۆزیسیۆنی کۆماری ئیسلامی بدات تاکوو لە چوارچێوەیەکی گشتگیردا کە هەموو نەتەوە و کەمینەکان بگرێتە خۆی، پێش بە شەڕی ناوخۆیی بگیردرێت.
هەروەها جەخت لەسەر ئەوە کراوەتەوە کە باشترین سیناریۆ بۆ ئاڵوگۆڕ لە ئێران، دامەزراندنی دێموکراسییەکی هاوبەش لەسەر بنەمای کولتووری و پەروەردەیی خەڵکی ئێرانە و پشتڕاستیش کراوەتەوە کە لە ئێستادا ئۆپۆزیسیۆن هیچ دوورەدیمەنێکی ڕوون و یەکگرتووی بۆ ئەم مەبەستە پێشکەش نەکردووە.
