بەپێی زانیارییەکان، لە دوای هێرشی ئاسمانیی ئیسرائیل بۆ سەر سەنعای پێتەختی یەمەن و کۆبوونەوەی کابینەی حکوومەتی حوسییەکان، ئەحمەد ئەلڕەهەوی، سەرۆکوەزیران و حەوت وەزیر و دەیان جێگری وەزیر و بەرپرسی سەربازی و ئەمنیەتیی ئەو گرووپە کوژران و لە کۆی گشتیی ئەو کابینەیەدا تەنیا ٤ وەزیر زیندوو ماون.
بەپێی ڕاپۆرتی کاناڵی "ئەلعەرەبییە"، ڕۆژی پێنجشەممەی حەفتەی ڕابردوو ئەرتەشی ئیسرائیل لە ئاکامی هێرشێکی ئاسمانیدا، گەورەترین ومەرگهێنەرترین هێرشی خۆی دژی ئەو حوسییەکان بەڕێوە برد کە لە ئاکامدا زۆرینەی نزیک بە تەواوی ڕێبەران، سەرۆکوەزیران، حەوت وەزیر، جێگری سەرۆکوەزیران و دەیان بەرسی ئەمنییەتی و سەربازیی گرووپی تێرۆریستیی حوسییەکانی سەر بە ڕێژیمی ئێران کوژراون.
بەپێی ڕاپۆرتەکان، ئەحمەد ئەلڕەهەوی سەرۆکوەزیران و هەرکام لە وەزیرانی ئابووری، پیشەسازی، سەرمایەگوزاری، کاروباری کۆمەڵایەتی و کار، وەزیری دادگوستەری، وەرزش و لاوان، وەزیری هاتوچۆ و هەروەها جێگری کاروباری بەرگری و ئەمنییەتی، جێگری سەرۆکوەزیران، جێگری وەزیری نێوخۆیی و جێگری وەزیری وڵات لە ڕەوتی ئەو هێرشەدا کوژراون.
ڕاپۆرتەکانی دواتر دەرخەری ئەوە بوون کە سەرۆکی نووسینگەی سەرۆکوەزیرانیش یەكێکی دیکە لە کوژراوانی ئەو هێرشە بووە.
هەر لەو پێوەندییەدا وتەبێژی ئەرتەشی ئیسرائیل لە بەیاننامەیەکدا ڕایگەیاند کە ئەو هێرشە، دامەزراوەیەکی سەربازیی کردووەتە ئامانج کە دەیان کەس لە بەرپرسانی باڵای گرووپی تێرۆریستیی حووسیی تێدا بەشدار بوون.
ئەو بەرپرسەی ئیسرائیل لە درێژەدا باسی لەوە کردووە کە: "لەو کۆبوونەوەدا، ئەو فەرماندانە بەشدار بوون کە بەرپرسایەتیی پەرەپێدانی پێکهاتەی سەربازی، گەڵاڵەی هێرش و جێبەجێکردنیان دژی ئیسرائیل بەڕێوە دەبرد و ئەرکی بە‌هێزکردنی توانای سەربازیی حوسییەکانیان لە ئەستۆ بوو".
زانیارییەکان باس لەوە دەکەن کە محەممەد ناسر ئەلعاتفی وەزیری بەرگری و عەبدولکەریم ئەڵغوماری سەرۆکی ستادی هێزە چەکدارەکانی حوسییەکان بە توندی بریندار بوون و باری تەندروستییان جێگیر نییە.
هەروەها وتەبێژی ئەرتەشی ئیسرائیل پەرژاوەتە سەر چۆنیەتیی ئەو هێرشە و وتوویەتی: "ئەو ئۆپەراسیۆنە لە ئاکامی دەرفەتێکی زانیاریی ورد و تەواوکەری چەرخەی ئۆپەراسیۆنی خێرای چەند کاتژمێری بەڕێوە چووە".
پێشتر ئیسرائیل هۆشداریی دابوو کە بەهۆی هێرشی ئەو گرووپە بۆ سەر ئیسرائیل لەوانەش فڕۆکەخانەی نێونەتەوەیی "بێن گۆریۆن"، بەهێزەوە وڵام دەدەینەوە.
حوسییەکانی یەمەن بە یەکێک لە گرووپە چەکدارە تێرۆرسییەکانی سەر بە ڕێژیمی ئێران دێتە ئەژمار و لەلایەن چەند وڵاتەوە بە گرووپی تێرۆریستی دەناسرێت و ئیسرائیل لە ماوەی ڕابردوودا هەوڵی داوە لە ڕێگەی هێرشی ئاسمانی و زەمینییەوە دەستوپێوەندییەکانی ڕێژیم لە ناوچەکە لاواز بکات.
