ڕۆژنامەی نیۆیۆرک تایمز لە ڕاپۆرتێکدا پەرژاوەتە سەر چۆنیەتیی دۆزینەوەی بەرپرسانی باڵای کۆماری ئیسلامی لەلایەن ئیسرائیلەوە لە شەڕی ١٢ رۆژەدا.
ئەم ڕۆژنامە ئەمریکاییە لە ڕاپۆرتەکەیدا باس لەوە دەکات کە ئیسرائیل لە ڕێگەی مۆبایلی تیمی ئەمنییەت و پاراستنی بەرپرسانی ئێرانەوە توانیویەتی دزە بکات و لە یەکێک لە گرینگترین کۆبوونەوەکانی حکوومەتی ئێران لە کاتی شەڕدا ئاگادار بێت.
ڕاپۆرتەکە ئاماژە بە کۆبوونەوەی شۆرای باڵای ئەمنییەتی ڕێژیم لە ٢٦ی جۆزەردان دەکات کە دەکەوێتە بەر هێرشی ئاسمانیی ئەرتەشی ئیسرائیل.
بەپێی زانیارییەکان، سەرانی هەر سێ دەسەڵاتی حکوومەت لەگەڵ چەند بەرپرسی باڵای دیکەدا لەم کۆبوونەوەیەدا بەشدار بوون.
نیۆیۆرک تایمز لەم پێوەندییەدا دەنووسێت: "ئەم هێرشە دامودەزگا ئیتلاعاتییەکانی کۆماری ئیسلامی دەباتە قۆناغی وێرانی و بەرپرسانی ئێرانی تێدەگەن کە هەڵەیەکی ئەمنییەتی قەرەبوونەکراو لە ئارادایە کە ئەویش هاککردنی مۆبایلی تیمی پاراستنی بەرپرسانی باڵای ئێرانە کە لە دەوروبەری کۆبوونەوەکەدا چاوەڕێ بوون".
فڕۆکە شەڕکەرەکانی ئیسرائیل لەم هێرشەدا ٦ بۆمبیان ڕژاندبوو بە سەر شوێنی کۆبوونەوەکەدا کە دواتر ژێرزەوییەک لە ڕۆژاوای تاران ڕاگەیەندرا، بەڵام لەم هێرشەدا تەنیا چەند کەس لە تیمی پاراستنی ئەم بەرپرسانە دەکوژرێن و کاربەدەستانی کۆماری ئیسلامی لە ڕێگەی ڕێڕەویەکی بچووکە دەتوانن خۆیان دەرباز بکەن.
هەوڵە سیخوڕییەکانی تاران و تێلاڤیڤ بە دژی یەکتر یەکێک لە تایبەتمەندییەکانی بەرەوڕووبوونەوەی دوو لایەن لەم ساڵانەدا بووە کە ئیسرائیل لەم دواییانەدا بە کوشتنی بەرپرسانی باڵا و کەسایەتییە شوێندانەرە ناوکییەکانی ئێران، لەم بەربەرەکانێیەدا سەرکەوتووتر بووە.
هاوکات هەوڵەکانی تارانیش بۆ سیخوڕیکردن لە ئیسرائیل، بەتایبەتی پاش ١٥ی ڕەزبەری ساڵی ١٤٠٢ی هەتاوی و دەسپێکی شەڕ لە ناوچەکەدا، زیاتر لە جاران پەرەی سەندووە.
